法治已死

爾擒我放有緣機

余家法治太水皮

荒淫惡行得天佑

誅惡無力確堪悲

怪事年年有、今年特別多。怪事一、有一名特殊宿舍舍長被錄像機拍攝到與一名只得八歲智商女院友性交嘅過程、並且在受害人身上和衣服均發現染有該舍長精液、但最後戒律師卻認為受害人無法企出來作證、便以勝訴機會不大而撤消控罪。呢嗱、若以戒律師嘅邏輯來推算、謀殺案理應通通唔使審就放人至係。怪事二、某飛刀會東主涉嫌迷姦一名女顧客、但他否認強姦、卻承認交替非禮。判決師聲稱被告人品格良好、有生意人頭腦、以及不想判刑影響其事業為理由、輕判做三十日義工了事。難怪坊間質疑、假如受害者係戒律師或判決師嘅親人、仲會唔會咁輕易放生嗰兩壇淫蟲嘅呢、吓？！

罪惡城唔止係有正治冇道義、最近還榮登罪犯天堂寶座。在下不是戒律專家、不懂戒律條文、但我卻知到、人是要為自己所做過嘅事負責、否則社會必亂、公義無存。之但係、原來誘姦智商低嘅女性、而受害人又不能作證嘅話、罪犯就無須面對戒律制裁。原來一個被判決師認為有品格、有生意人頭腦嘅性侵罪犯、是可以做義工抵償姦淫罪責的。佢呀爺吖、身為戒律師、明明擁有足夠證據證明有人確實性侵犯八歲智商女士、居然以受害人不能作證就連告都慳番、難道戒律師認為一個八歲智商嘅人懂得性交是怎麼樣的一回事？既然受害人無能力作證、點解唔引用保護婦孺條例、以及利用「科學監證」去完成此案？身為判決師、將一名用下九流手段迷姦女性嘅罪犯評價為「有品格、有生意頭腦」究竟想點？依照當今形勢看來「不守法並不得同不尊重法律」嘅教條、已經在罪惡城發揚光大。搞成咁、到底是誰之過？