公屋縮水居屋有價

阻頭又阻勢

全不受控制

以毒來攻毒

贏輸一樣廢

開講都有話、多講無謂、行動最實際。呢嗱、無論縣太爺講到自己推銷嘅雙辣椒有幾咁巴辣都好、總之事實就係今年落成嘅私人物業又創高鋒、而公屋則創大歸以來新低、都可謂仲衰過做女嗰陣時咯！不過這個現象也算不了甚麼、最有意思嘅就係新建成嘅居屋雖然是同材料、同質量、亦同是由縣府出資建成、但售價方面就大不相同。有些售六千両一尺、有些售九千両一尺。理由是居屋售價都會與座落同區樓價掛勾、即係話居屋座落於貧民區就會大平賣、座落於中產區就會貴啲賣、假如一個唔覺意座落於縣太爺官阺隔離肯定是天價。喂喂、咁搞法仲點算係幫助基層人士置業呀？如果按照呢套邏輯去計算、公屋租金豈不是亦有蕃薯價與海鮮價之分？難怪連你老闆都睇唔過眼、企出來公開指地產霸權從來唔係佢哋、而係奉行高地價政策嘅金紫荊政府。

所謂一蟹不如一蟹、古唔到呢句嘢在紫荊城應驗咗。自從朝廷親手把持金紫荊改革（金改）之後、紫荊城總督衙門便被降格為知縣衙門、堂堂英明神武嘅總督大人被貶為芝麻綠豆般大的知縣老爺。咁搞法、都可謂抬棺材甩褲、失禮死人矣！日前縣府自爆覓地建公屋時處處受到反對和掣肘、以致加速公屋輪候者上樓嘅承諾無法達成。看來縣府似乎在暗示、既然你們眼巴巴看着反派團體屢次搗鬼都就手旁觀、那就不要埋怨不能上樓了！縣太爺在此時此刻講這種話、難免今人覺得有卸責和點火之嫌。唔知今次又會不會有反對反對派嘅公開簽名運動呢？

坦白講、縣府委過於人是無意義的、小市民根本冇興趣去計算縣府與政客之間嘅瓜葛、但對於縣太爺失信於民必然會感到不滿。假如縣太爺繼續奉行那套以矛盾制矛盾的管治方式嘅話、社會被撕裂程度勢必更加嚴重。由其是他那種自我感覺良好嘅態度必會毀去所有可以迴旋嘅餘地、到頭來輸得最慘烈的一方絕不會是他和他的對手、而是紫荊城市民！