買樓乜都免？

你出雙辣招

我將松柴標

屙尿射穿牆

無驚斷擔挑

前日在瓊天大酒吃飯時、無意中聽到隔離台有人講起買樓有着數、內容大概如下：

「小陳剛剛榮升業主、並且約埋班老友記到新居吃飯。」

「加陣買樓、好貴喎！」

「一啲都唔貴、一千尺都係賣五百萬之嘛！」

「係咪老年樓嚟架、咁平嘅？」

「大約廿年樓齡、但係成躉大廈都未曾入伙架！」

「有冇咁大隻蛤乸隨街跳呀？」

「梗係有啦、而且免印花稅、免律師費、免首期、十年分期付款免利息添架！」

「真唔真架？」

「老實話你知啦、小陳嘅老表在雙辣招推出之前、以公司名譽購入多個物業、層樓就係老表轉讓給他的、無須經律師行辦理轉讓手續、無須到填土廳辦理轉名手續、只須要兩人私底下納一份臨時買賣協議書。供款方面無須向銀行按押、只須按月直接過數往老表提供嘅戶口。樓契暫時由老表公司保管、直至所有餘款付清之後才交給他、然後再辦轉名手續便大功告成。」

「點解要咁遲辦轉讓手續呢？」

「老表肯定雙辣招絕不會長久維持、將正式交易日期延至辣招取消之後才落實雙方都有着數。」

呢嗱、呢單嘢唔知你點睇、但在下就有啲驚驚哋、萬一有人將物業轉按押給財務機構就大鑊。假如事主宣布破產或冇錢還債、就會有人來收樓、到時人家揸住將屋契、小陳就算打官司都有輸冇贏、而且分分鐘還要背負合謀瞞稅嘅法律責任、到時就賠了夫人又折兵。係咁就真係喊都無謂矣！