瞀里評七一

亂世妖邪多

難分佛與魔

妖言當惑眾

敗氣夾囉唆

日前又有條瞀里（茂里）在鄉下那份「半棺荒」刊物蠻求日報發表了一編對七一睇法嘅屁論。嗰條瞀里將幻想當事實、夾硬話：「從前紫荊人生活水平長期高於大鄉里、但現在眼見人家發大財、而自己就打倒蹆、所以產生強烈自卑。紫荊人為了要證明自己尚有比大鄉里值得驕傲嘅地方、於是選定每年七一齊齊湧上街頭挨風、抵雨、曬日光、目的是要做畀大鄉里睇、在龍的傳人之嘅世界之中只有紫荊人膽敢跟紅家對着幹。文章雖然講到似曾曾、之但係在下點睇都唔覺得係咁嘅、恐怕連有分參加遊行的街坊亦勢難想像、原來自己跑上街頭示威嘅動力是來自自卑感的。

人家係點嘅我唔知、但我很清楚自己係點嘅。在下雖然從不參加任何政治性遊行示威活動、但並不表示自己冇政治立場。在下既不是紅家擁躉、亦不是花家粉絲。如果你問我想唔想要真正的民主、我會答我很想要。但我會話你知、我絕不會跟隨當今兩大陣營任何一方的步伐走、因為我不認為正紅旗班友仔會支持真民主、也不認為雜牌軍班人像小學雞一般的賴在地上、人家就會答應你嘅要求。我只知到一個龐大嘅“既得利益”集團、絕不可能為着成全異己者嘅要求、而置江山於危而不顧的。除非你有本事令到紅家裡面有人造反、又或是你能夠取代紅家則另當別論。問題係得咩？唔好玩啦！在下清楚記得當年「南天門之變」事件之中趙老大（當時嘅紅家冧巴溫）係點樣“被”玩完、所以我絕不相信當今嘅揸拂人會步他的後塵。

由於城中有人故意挪開紫荊人個肚皮畀花家睇、而成就了那群靠掹紅家車邊維生嘅二打六利用是非做人情、令揸拂人相信金紫荊快將要變成洋紫荊、再加上唯恐天下不亂嘅蠻求日報久不久便以一支竹杆去打一船紫荊人、而激發城中輿論強烈反彈。揸拂人見狀當然更加惱怒、結果兜本「拔皮書」掟過來、想話壓一壓城中河蟹嘅氣焰。殊不知居然殺錯良民、何蟹死唔去、反而導致更多小蟻民在七一當日跑上街頭表示不滿和憤怒。假如事情繼續朝着這個方向發展嘅話、紫荊城必將大亂。