自講一部份

效忠不效忠

全屬發噏風

冇鞋挽屐去

由你在夢中

萬歲爺的一紙「拔皮書」擲下便立即在金紫荊「施法屆」引起哄動、日前兩個撞師公會都有會員與一眾法師齊齊上街遊行示威、以沉默姿態表示抗議「拔皮書」所指法師是自講一部份違反歸本法。呢嗱、現在的問題是、點解當呢班大法師知到自己原來係自講一部份就會受寵若驚到這個田地呢？聽講原來係有段古嘅。

講人自講和高度自視是祖師爺爺給紫荊人的誠諾、然而將愛國與愛講混為一談所受歡迎嘅程度就不一樣。大法師今次之所以集體抗議、無非是要保護自己嘅利益。由於歸本法闡明容許金紫荊各級法壇兩成法師由非本土人士出任、但一句自講一部份就產生了一個十分嚴重嘅問題、如果不及時澄清嘅話、大法師們嘅飯碗恐怕隨時不保矣！要了解問題首先要搞清楚何謂自講一部份、以及所需要的條伴又是啥。所謂自講一部份即係講人自講其中一個環節、而講人嘅定義就係指必須在本城住滿七年而又擁有天朝國籍者、而目前金紫荊法壇聘用的大小法師除咗本地人之外還有一群洋人和一群洋籍人士。要求他們效忠歸本法絕無問題。要求他們在作法時同時顧及國家利益更加冇問題。但必須要搞清楚、大法師當然有義務要照顧國家利益、但天朝絕不是他們的國家、而且人家只不過是來打工、強迫他們效忠等同迫人家變節。所謂忠臣不事二主、假如你唔滿意咪炒佢魷魚囉、但無權迫人變節吖嘛！因此難怪有人認為朝廷今次這樣做、目的就是要將洋法師或持有外國國籍嘅法師通通驅逐出金紫荊法壇了！

回望大歸十六載以來、無上法師作法時曾經出現過與朝廷意見相左的情況。在過去無論無上法師在全城第一宗雙非仔「裝瘋猿」事件作法、抑或是在某些對金紫荊有較深遠影響的問題上作法、都出現與朝廷意見相左嘅情況。朝廷早就意識到若要使無上法壇嘅施法運作合乎國家利者嘅話、必先清除瘀血、決不可再讓那群被譽為有洋參而無紅參嘅大小法師繼續在各級法壇也文也武、否則在山高皇帝遠嘅形勢之下、聖旨就無法下達。因此萬歲爺早在幾年前就向紫荊人推薦「行企、勒法、施法」三拳合一方案。可惜嘅就係、唔講由自可、一講就禍咗之嘛！今次捲土重來、大有泰山壓頂之勢。問你點頂？