頭大冇腦

有好不學好

頭大腦生草

人浮失馬步

注定躀溝槽

呢嗱、賭仔口中嘅「鳳凰啤」即係睇定而後食、意思即係話有啲人永遠都會托住個羅友吊頸、肯定實食冇黐牙才會出手。剛過去的星期六反戰中陣營宣布收集到嘅簽命已超過預期嘅八十萬、不久府衙傳出已有紊責官大爺亦有簽名、然後輪到督爺跑出來話自己都會簽名、這陣子都可謂意氣風發矣！假有人以為督爺今次高調說自己會去簽名旨在催谷人氣嘅話、在下只能說結果必是適得其反。

呢嗱、唔係在下又撥冷水、今次紊責團隊高調簽名、等同在形象已經不濟嘅衙門踩多兩腳、結果肯定會連累整個簽名運動、講得上係陸雲霆睇相、無衰攞嚟衰。相信但凡不是用個屁股去思考嘅人都想到、一般市民在意識形態方面作出表達時、通常都不希望與官方沾上半點關係、更加不想被人誤解自己被收買。然而今日坐在廟堂之高者似乎永遠不知江湖險惡、除了把握一切機會展示忠心護主之外、恐怕別無它長。在下剛剛收到侄兒電話、對於自己簽名嘅原本動機被人歪曲感到無奈。他說簽名反佔中只是不想見到金紫荊經濟受到無謂沖擊、但勢想不到官老爺一口咬定簽名反戰中等同願意接受官方提出的普選的。他質疑、目前官方連普損藍圖都未正式公開過、憑啥一口咬定簽名反佔中嘅人是支持的呢？

剛剛聞得簽名大旗手白頭兜話、上周末一日之間能夠收集到廿三萬多個簽名是與盟主派收取獻金醜聞有關、但在也下可以話你知、假如市民簽名熱情忽然下滑、就是受到官老爺過分意氣風發嘅言行影響。唔信？那就拭目以待吧！