兩毒結盟

五毒聯群賣風騷

登時入夥有錢途

抬講兩毒同聲氣

紫城慘被過一刀

呢邊廂、候任城督冧井啱啱至喺公仔箱大大聲話講毒冇料到。嗰邊廂、播毒五人組、豬仔滴、籮半蔥、塵拂泉、兜應眶、戇痴瘋（下稱五毒）、飛到抬島出席抬島國（由㒼進黨和時代食量合力創立嘅一個島毒組織）嘅國會會議。其間通過成立「抬講亂綫」加強抬島和紫城兩地毒派聯繫。嗱、今次五毒分明係請冧井食兜巴灼麵、仲食到巨連大牙都甩埋𠻹！所以話啫、千祈咪輕估自己嘅敵人、否則一定係賴嘢多過食飯。之但係、究竟今次係真賴嘢、抑或係真搞嘢、我堅係唔知到。倒不如大家放長雙眼慢慢睇、有可能會睇出一些端倪。講起嚟、呢單嘢都算詭異、五毒敲鑼打鼓話畀人知佢哋出席咗抬島國國會會議、並設立咗一條抬講亂綫、但事後成班友又公開死撐、話“亂綫”唔係勾結。究竟呢個葫蘆裡面裝嘅係乜嘢藥、我就睇唔出、不過卻想象得到呢五條冷裡面其中三個人必定手尾長、分分鐘連垃圾會尊貴都冇得做。

廢援署叻番一趟

長島托子號桌堅

擅打荷包夾出千

無奈廢援不賣賬

呢鋪撒賴也枉然

呢嗱、罪惡城揸拂堂喜歡搬起石頭揼自己對腳就係人都知架嘞、由其是以廢率援助署為甚。該署唔止每年向假爛民提供廢援之外、還向那些專門替政黨做爛頭碎嘅專業蝠瞎人發放援助金、好讓佢哋將“司廢界”當作獅子咁舞。其實大家都有眼睇、呢類所謂專業蝠瞎人只不過係政黨嘅傀儡、基本上全都是被動的。因此佢哋打嘅官司、通常都係十打九輸的。事實上、呢班傀儡從來冇打算過會贏、其目的旨在玩殘金紫荊而矣！罪惡城不乏蝠瞎王和蝠瞎后、但其中名氣最大的就是長島蝠瞎王托桌堅。

恐嚇收風男餘波未了

雖是同行非敵國

抬吹托打各顧各

今日滿城心火盛

冇人把鑊孭上膊

日前凍舟社收風男被平哥社大龍頭皮佬𡅏在危苑「八狗六死」追憶會當眾燒數簿、事後除咗凍舫社出面撐凍舟社收風男之外、其他行家皆三緘其口、由其是收風人協會更加係一改急先鋒作風、居然連屁都冇放一個。凍舫社見到咁嘅情況、便在旗下喉舌發炮猛轟收風人協會就手旁觀兼冇義氣。不過、依在下看來、凍舫社可能對收風人協會有點誤會。嗱、唔信邪嘅就回頭望望過去、每當平哥社、日月社、甚至誠誠社等社團嘅收風同業稍為受到驚嚇時、收風人協會嘅發言人就馬上飛撲出嚟加以譴責、而且仲分分鐘去報官𠻹架！誰敢說收風人協會唔幫行家兼冇義氣？喂、聽講今次都有人去報官喎！會唔會係收風人協會幫咗手冇人知架咋？

皮佬𡅏老貓燒髮

身為一代掌門人

翻起白眼倍沙塵

開口𪘁脷唔緊要

弊在當眾發牙痕

「點咗你相、我實教你、燒你數簿」。嗱、以上嘅話唔係我講嘅、而係大名頂頂嘅平哥社坐館爺皮佬𡅏講嘅。話說、當皮佬𡅏在危苑出席一年一度嘅“八狗六死” 追憶晚會時、忽然走到凍舟社一名年輕代表面前、篤住其鼻、開口就講點咗人家個相、繼而又話實會教人、仲話燒埋人家本數簿𠻹！喂、咁搞法、會唔會惡咗啲架？之但係、那位凍舟社代表嘅反應只係對着皮佬𡅏傻笑。可能佢認為皮佬𡅏已經跌咗落個“嚇騷擾”他人嘅法律陷阱罪都未定啦！唔知皮佬𡅏係“偽”高人膽大、抑或係想親身到公家祠堂一嘗水飯滋味、竟然當眾玩疑似“嚇騷擾”遊戲、使得謀些正義感爆瀉嘅塘邊鶴跑到巡捕房報案、指控有人涉嫌恐嚇他人。勢難想像、以皮佬𡅏這號一代梟鶴、居然也會墮入口舌陣裡面嘅。難怪戇痴瘋連腦囟都未生埋、就被花大叔捧為世界第十名猛人、而皮佬𡅏連跟尾聞屁嘅資格都冇啦！

出口術

扣人帽子笑哈哈

帽子人扣打甩牙

紫城遍地唯威喂

硬係無𤶸造笪𤶸

呢嗱、出口術又呢家嘢又叫做語言偽術。反盟經當指責城督阿狼係語言偽術家。現在問題係、究竟反盟又有冇出口術嘅紀錄呢？日前反派尊貴烈女妝指出、朝廷對「歸本法」嘅理解跟紫荊人相距甚遠。嗱、首先要講明嘅就係、反盟一向都是把「一數兩計、講人自講、高度自視」講成係「講人自講、高度自視」而把最重要嘅一環「一數兩計」掉咗去鹹水海吖嘛！但係、實際上係先有「一數」才有「兩計」、然後才輪到「自講」和「自視」。換言之、沒有「一數」嘅話、咁就乜都冇得「計」咯。由此可見、朝廷對「歸本法」嘅理解、跟紫荊人並無兩樣、而只係城中反派政客跟朝廷嘅解讀有異意而矣！因此反盟指朝廷對「歸本法」嘅理解跟紫荊人不同本身就已經是本未倒置、其真正目的旨在混淆大眾視聽至係。

第一的背後

世貿排名再第一

荷包立到氣都咳

老闆腰肥褲又窄

員工瘦剩皮包骨

紫荊城連續兩年獲得“全球最佳投資城市”冠軍榮譽。嗱、就算話在下又潑冷水都要講架嘞。究竟這個世界第一嘅背後是代表些甚麼呢？不問而知、當然是能夠吸引大量外資投人、以致大商號生意越造越興隆吖嘛！喂喂、咪高興住、須知到當下城中嘅生活成本和租金都是貴絕全球、咁本城又憑乜嘢去吸引大量外資投人呢？簡單講句、咪就係工資低廉囉！嗱、唔係我亂噏、有數據畀過你睇嘅。自從沙氏襲城至今14年裡面、平均工次升咗14%、而樓價就上升咗150%。昭咁睇、係人都知到究竟係誰在享富貴、誰在嘆閉翳啦！係嘛？

胡鬧的官司

常無搞搞震

判頭瞌眼瞓

懶籠非和是

亂棍打一身

呢嗱、講出嚟真係唔知好嬲定好笑。常無坐花廳居然坐出靈感來。佢入稟公堂控告花廳部別歧視。原因係花廳部淨係迫男囚犯剪短頭髮喎！當初常無人稟時、都唔知有幾多人譏笑佢戇居夾無知、甚至連反派架忌冷都揶揄佢不自量力。殊不知盲丙遇上瞎老爺、常無居然獲勝。就係咁、全世界都跌晒眼鏡、搞到通街都係玻璃碎、使得班清道夫淨係掃玻璃都掃到手軟。嗱、呢單嘢唔係就咁埋口、花廳部主管正在搞緊上訴手續。大家不娘拭目以待啦！