不平等竹戰

你說我惡不是惡

得閒無事將懵搏

有條瞀里唔知埞

撩隻老虎打相撲

日前麻雀公會主席淵博強終於企出嚟、就全城爭議嘅不平等雀局表態。阿淵話、佢睇唔到那場雀局有不正常情況、同時亦指出、所謂公證人包庇一方、打壓另一方嘅講法、完全係毫無根據嘅指控嚟。淵博強講完後轉身便走、連記者繼續追問（睇唔到和毫無根據、係咪等同“有”而只係佢唔知到）都懶得回應。嗱、件事係咁嘅、某日黃惠乒員外為其三歲兒子擺壽宴、荔枝英、尋日滾、賣田李、么挺四人約定好到時開枱打麻雀嘅。殊不知尋日滾臨時甩底、使得枱牌陷入三缺一狀態。就在此時、不請自來嘅藍軍堯忽然走埋去挑機。於是就此成局、立即開打。在一開始嘅時候、阿堯威風八面、將么挺打個落花流水。可惜阿堯被勝利沖昏頭腦、並在洗錯牌疊打錯骰嘅情形下、給予對方使橫嘅藉口。於是就發生以下嘅事了！

期間、阿堯手揸二三萬、見到對家么挺打出一萬便開牌食餬。點不知、荔枝英、賣田李、么挺三人齊撳阿堯食詐餬。理由係、阿堯嘅二三萬只能食四萬、食一萬係詐餬嚟。過咗冇耐、么挺同樣係手揸二三萬叫餬、而且食阿堯打出去嘅一萬。正當阿堯撳么亭食詐餬之際、荔枝英和賣田李兩人齊聲話么挺食一萬係啱嘅。阿堯問、點解佢食一萬當詐餬、而么挺就唔係？答案係、阿堯係以二三萬叫四萬、而么挺係以三二萬叫一萬。阿堯追問、點解佢嗰鋪牌要順數、而么亭鋪牌卻可以倒數？答案係、那是規舉、冇得解嘅喎！阿堯問、係邊個定出嚟嘅規舉？答案係、佢哋三人臨時定嘅。阿堯追問、究竟佢哋憑乜嘢能耐私下定規舉？答案係、當時嘅有利形勢在佢哋嗰一邊。阿堯問、佢可唔可以選擇馬上退出唔玩。答案係、如果阿堯能夠走得出那個門口再算。事已致此、阿堯終於明白到、決定贏輸嘅因素並不在於道理不道理、更不在於規則不規則、而係在於誰比誰的形勢更強。嗱、有冇覺得上述情況有啲熟口熟面呢？無論答案係點都不必講畀我知、你自己知到就得架喇！