𡁻完唱

常聞𡁻完鬆

𡁻完稀有唱

瞀里發牙痕

當堂出異相

開講有話、𡁻完鬆冇問題、𡁻完彈冇風度、𡁻完唱冇人格吖嘛！誰知真係有人𡁻完唱架！話說、早前下環區蚊症部率領一個五天交流團到扶桑驚都作學術交流。整個行程只訪問咗一家教館、所花嘅時間僅僅是兩粒鐘、其餘時間都是四處吃喝玩樂。總消費是35萬両銀子、每人消費15800両銀子、平均每人每日消費3700両銀子、算起來仲貴過去歐洲、都可胃豪中之豪矣！雖然蚊症部狂益街坊、但係偏偏遇上一號𡁻完唱嘅人物、搞到件事通晒天都唔止、仲要累到蚊症部被人猛挖啲舊史出嚟唱吖嘛！咁你話嘞、呢壇瞀里係咪抵鬧？

俗語話齋、有便宜唔使頸吖嘛！公家銀両不花白不花、幾大都花咗再講。當年垃圾會也曾搞過交流團、間中亦傳出掛半頭賣狗肉嘅傳聞。在某一次嘅交流團之中、有部份專貴帶埋個老婆一起去、並由公家負擔所有費用。在東窗事發之後、有關尊貴才急急扲荷包填番條數。因此、呢類貪小便宜嘅事、早已唔係新聞嚟喇！嗱、如果當時唔係有多口仔大整蠱將件事踢爆、而係留到競選時才爆出嚟嘅話、有關尊貴想冧莊都幾難。由此算來、該尊貴當時雖然被人鬧到眼都花埋、但實際上人家係幫佢多過害佢嘅。否則又點可能冧莊架？所以話啫、平日專門佔據道德高地“今日這個行為不端、明日責那個假公濟私”嘅人物、原來亦只不過係五十步笑百步而矣！嗱、呢類尊貴過得初一、但過唔到十五。結果上次就有人輸咗畀班後輩了！之但係、今次機會又來了！因為上次擊敗他們的對手已經有六人被DQ咗、重選亦就快舉行。所以失敗尊貴為爭取曝光律就係水都抽。可惜人算不如天算、有人上次抽腍柿健“自釘男”嘅水時、居然抽着屎水、搞到成個人臭晒、都可謂所料不及矣！照咁睇嚟、呢幾條老鬼想重出江湖都唔係咁容易喇！