就怕㘉濕身

學生亂爆粗

校長當做騷

外表挺開放

內裡太糟糕

自從去年見識過靚男大學堂（靚大）學𡃁開嘅跳老舞派對之後、終於發現在下從前所接受過嘅教育係完全錯晒架！當年教頭對學𡃁管教非常嚴格、莫講話嚴禁跳老舞、即使在講話當中嘅字眼稍為粗魯都要被記過。反觀今日嘅學堂除咗可以跳老舞之外、掉埋人家隻姆犀布公仔都冇問題。更加過引就係、可以奉旨在㒼主牆上張貼恭賀他人家中掛白、以及掛上煽動他人造反嘅標語都得吖嘛！講到呢方面、在下最佩服嘅人就係靚大學堂館長靜覺汗喇！佢雖然公開表示反對講獨、卻堅持㒼主牆上出現講獨標語純屬討論、而且很樂意讓佢班學𡃁見識到教館內不同意見。嗱、淨館長呢種又夠薑、又敢做敢認嘅人、在全城大學堂館長之中絕無僅有。無論閣下是否認同淨館長嘅政治立場、都不能不佩服他幾分。因為真小人比偽君子旗幟鮮明得多吖嘛！

嗰壇又要威又要戴頭盔嘅黃思教界頭代表孽猿忽然跳出來話自己不支持講獨、卻認為講獨是可以討論的。大撞幫元老五愛二更加係衝入樁大同班學𡃁打氣、叫佢哋企硬唔使驚。嗱、咁多問題都討論、偏偏要搵個造反議題嚟討論、仲話唔係擁人家仔女去當炮灰？睇見呢班口講不支持講獨而又猴擒成咁嘅政棍和教頭、就知到佢哋係好人有限。首先、佢哋聲稱不支持講獨、就是要當眾與講獨劃清界線、將來講獨有乜冬瓜豆腐都與佢哋無關。其次就係、唯有讓學𡃁朝着講獨方向繼續糾纏落去才會有機會搞亂罪惡城、以滿足幕後大老闆嘅期望。呢嗱、在下記得當孖學三條𡃁被判坐監之後、黃思主教陳夜𧥺忽然跳出來耷低個酸薑蕎（頭）、一面起勢眨眼、一面口噏噏咁話“點解仲係冇人上街抗議、換轉係別的地方早已暴動咗喇”嘅一番話嘅時候、我仲以為佢砍親個腦才會亂噏廿四。現在諗起嚟、原來陳夜𧥺主教當時係兜個圈去責備班黃思教頭做唔到嘢。照咁睇嚟、陳夜𧥺已經泄露天機、亦即係話大亂將至。如果我係縣府揸拂人、就會認真小心去處理講獨呢單畸屎、萬一被㘉濕咗個身連曬都唔乾、咁就弊家伙架喇！