由安家費講起

入冊唔安家

遲早實聽瓜

若有銀子挺

唔怕個底花

呢嗱、開講都有話、出嚟行嘅唔係為銀両、唔通為老感咩！係嗎？自從十六名社團手足被判入冊之後、出嚟行而又諗住唔使還嘅蠱惑仔紛紛跳船、游水上岸重新做人。大撞社見到勢色唔對、便派遣白葵扇伍愛貳與蚊連社坐館常無在黃思聯盟（黃盟）總壇、就設立安家費一事召開代表大會。經過一論商議之後各大社團終於達成共識、向受靶嘅兄弟提供每人每月一萬両白銀作為安家費、直至出冊為止。嗱、呢單嘢由大撞社攬上身去搞係啱架！鬼叫該社嘅雙花籐條涼茶杰在黃亂期間對班𡃁講、唔守戒並不等同破戒、結果累到十六條𡃁齊食祠堂（監倉）飯咩？如再不從速補鑊嘅話、以後搵鬼替佢哋賣命都得喇！

自從後台大老闆花大叔閂咗個水龍頭之後、黃盟所有堂口只係靠食穀種度日、若然解決不了五行欠水嘅問題、睇怕大家都唔挨得幾耐、到時藍思聯盟（監盟）勢必乘虛而入狂搶佢哋嘅地頭。可惜在今日呢個形勢之下、想找一條大水喉出來並不容易。一向水頭充足嘅三工號大老闆剛閘民當下又被蘇州屎纏身、過得初一亦未必過得十五、睇怕呢條水喉都幾難再重啟咯！另外就係、力牆號大老闆盛賈里對江湖上嘅爭鬥意興闌珊並萌退意。更不堪就係、早前白鴨仔腍柿健自編自導自演那齣“老屈紅家會”嘅戲穿咗煲之後、黃盟個朵都被佢搞臭晒、以致所有頭領人人賤格、個個樣衰、使得花老闆異常惱怒。假如呢單嘢真係搞到冇晒彎轉嘅話、就算將看更李、鐵頭可、鐵腰達、冧雀蜓幾隻白鴨及咕哩頭剁人里擺晒上台祭旗都冇用。現在惟有睇吓經理人荔枝應有冇本事勸掂花大叔打消閂水喉嘅念頭。現在黃字堆唯一可以做嘅就係自製機會出擊、爭取佳績讓荔枝應帶去見花大叔碰碰運氣架咋！