喪普與肥恩

喪普遇肥恩

稟神冇句真

仇家共老友

有着兩份分

照牌面睇、花大叔面對着潮仙文攻不得、武打不能、還要被肥仔恩將自己嘅大牙續隻剝下來、都可謂床板夾乜乜、痛得唔叫得咯！花大叔呢頭話、若然潮仙再試射導彈、他就會開打。然而、肥仔恩唔止將導彈射過架仔上空然後落到太平洋、還要試爆多一次氫彈、氣得花大叔拍枱拍凳、但就係唔打過去。嗱、事實證明、肥仔恩玩核武讓花大叔有藉口在高麗安裝「殺得」反導系統、氣得紅老大面紅面綠。另一方面花家利用釣魚島搞到紅家跟架仔無法和解。就係咁、那個由紅家、架仔、高麗合作搞嘅「東北亞經濟三角共同體」計劃散晒喇、而花大叔擔心嘅事亦就此消除、而架仔和高麗亦只能乖乖哋回到花大叔身邊繼續做一條狗。計起嚟、唯一獲得利益嘅人就只有花大叔一個。難怪陰謀論咬定肥仔恩跟花大叔係有台底交易架啦！

嗱、話口未完、喪普以紅家冇好好地抵制肥仔恩為藉口、呢頭話啟動301條款制裁紅家對花家嘅貿易、嗰頭又話將紅家排除出花銀經濟體系之外。另外喪普又下令花軍編時間表增加海軍每月到南海橫行嘅次數。咪話在下睇死喪普只屬吹水唔抹嘴。須知到搞一次小規模海上軍演、動輒要花上過千萬花金。如果是大形軍演、更加係所費不菲。即使只派遣一條航母在南海兜個圈、最低消費亦不少於一百萬花金、何況是一個計有數艘水面和水底艦艇嘅戰鬥群？以目前花家財政狀況而言、要抵制紅家簡直係陸雲霆睇相、無衰攞嚟衰。最新數字顯示、花家當前儲備只有109億花銀、所欠嘅外債卻有20萬億、單單欠紅家就已經超過一萬億花金。換言之、將整個花家重複賣幾次都唔夠還債。今日花家嘅底氣完全是依靠強大軍事力量、以及盟友支持。但喪普卻顯示出唔信鏡咁款、周時畀面色班盟友睇。畢竟世界已經變遷、人們視野亦不斷擴闊。從前貧窮落伍嘅國家已經漸漸懂得尋找合作伙伴開發天然資源去改善國民生活素質、花家恃強凌弱嘅時代已經不合潮流。若花大叔不能與時並進嘅話、無須別人來搗亂自己亦會玩殘自己。因此喪普開口制這個、埋口裁那個、跟本上全部都是屁話來。如果沒有共同利益者支持、花大叔只能算是一個潦倒老人而矣！假如花家以為可以靠船堅炮利去欺負弱少嘅話、肥仔恩就會話畀佢聽休想再做夢矣！如果我係花大叔嘅話、就會好好的去讀一吓羅馬帝國興亡史咯！