低能惹的禍

嘩眾搏取寵

搏懵變面懵

焚香倒轉插

賤到冇人同

日前巡捕房飛鴿傳書告知蟲柴井、他將會被控以“在垃圾堂上倒轉神主牌和倒插香燭”兩罪。點不知、蟲柴井話唔接受預約拘捕、今是就被人鎖返去落案喎！佢仲話、呢彈嘢在垃圾堂發生、所以巡捕房應該先通知垃圾堂嘅。呢嗱、我唔知到究竟垃圾堂能不能成為蟲柴井違法嘅避風塘、但卻知到佢倒轉神主牌和倒插香枝確實神憎鬼厭。因為神主牌乃是先祖嘅象徵、而香枝乃敬奉神靈之物、所以蟲柴井嘅做法就是撩鬼攞命、死亦怨不得人。開講有話、寧犯天條、莫犯眾憎、假如蟲柴井唔鍾意拜神咪唔好拜囉！為乜要去侮辱先祖、兼同族人過唔去啫？蟲柴井今次攞先祖個神主牌出嚟侮辱、咁就當然係人神共憤架喇！基本上、佢有權選擇唔認係龍之後代、但冇權去侮辱龍之一族吖嘛！所以嘛、推出午門者、捨佢其誰？

講開又講、某些垃圾尊貴視法律如無物、滿以為在垃圾堂內就可以為所欲為、認真豈有此理啦！係嘛？！難道垃圾堂係免死堂乎？如果係咁嘅話、垃圾堂豈非變成冇王管？當今垃圾堂已經變成政棍格鬥場、跟服務社會嘅宗旨越走越遠。在下認識的街坊之中、十之八九對垃圾堂皆不寄以厚望、甚至有厭惡之意。假如裡面班尊貴繼續上演爛劇嘅話、紫荊城想唔打倒蹆都難矣！既然班政棍咁鍾意三權互制、那麼在堂內犯法嘅人理應受到法律制裁至係嘅。絕對不能讓垃圾堂成為罪犯庇護場地。呢啲就叫作正人先正己、亦可以話係政治上嘅平衡嚟。須知到、法律是保護所有人的、冇人能夠凌駕在法律之上、垃圾尊貴並唔係大晒嘅。雖然垃圾堂尊貴在發表意見時、是擁有某些法律責任上嘅豁免權。之但係、並不表示做任何違法行為都可以。難道有人會同意在垃圾堂內犯法、係可以獲豁免起訴嘅咩？如果係咁嘅話、豈不是仲惡過黑社會？