知面不知心

聽言觀行費須時

真情假象那得知

當日托抬今賴賬

組班無力靠權宜

江湖上流傳、選戰期間反盟對打得井嘅攻擊聲強力弱、原來係受到幕後限制的。據說擺𠾍佬上枱完全係掩眼法、而那位過氣判頭更加係淪為走在獅子前頭嘅一個大頭佛。咁即係話、打得井確實係眾望所歸嘅人選。之但係、有一群奉名替她抬轎嘅人、今日卻與她保持最少三尺距離、甚至可以話係格格不相入。有人預料、打得井即使完成組班、但由於高手難求、所以未來五年並不好過。在下亦隱隱感覺到、當她上任城督之後就會出現綁手綁腳嘅情形。雖則話、無論是大老闆或是大土紳都好、絕唔會揀一個包拗頸嘅人出來倒自己嘅米。但今次抬舉打得井是不是其人本來意願就好難講。點講都好啦、打得井就是被這群人捧上台架喇！

當日𤷪陣趁着打得井民望薄弱、準備號召擁躉上街展開倒井行動之際、卻被金主及時喝停。咪話在下以小人之心去度君子心腹、單看在選戰期間反盟對打得井嘅攻擊完全係無關痛癢、就知到係見招唔見力嘅虛招嚟。否則又豈會連一點稍具殺傷力嘅黑材料都挖不出來？君不見當年反盟僅僅使出一招、就將麥缸打發了嗎？在下絕對唔相信世界上會有完人嘅。唔知你又點睇？今次奉命上京受封嘅打得井起行前貿然爆響口、話要替反盟“反對發三一”嘅意見向萬歲爺反映。難道有人會認為經過黃亂之後、萬歲爺依然唔知到發生咗乜嘢事？難道又有人認為萬歲爺會撤銷「發三一」規定？假如有人以為、此舉可以使得反盟日後對自己手下留情嘅話、簡直係妄想。若然以為將個波踢回返朝廷就可以令萬歲爺改變初衷嘅話、更加係愚不可及。嗱、我唔係靠嚇架！人未上位先則膊、萬歲爺必定會記低呢筆賬嘅。睇嚟、若非有人政治智慧過弱、就係有人自信心過強。嗱、小心䟕錯腳、踩番落自己個氹度至好呀！知冇？