甩轆 放水 被人𢵌

坐館叫我去捉虫

學足關帝坐華容

先生來到黑透面

有條茂利褲穿窿

話說紅家會轄下嘅紫荊堂前年鬧鬼、而且越鬧越凶、越鬧越大。總舵主得知此事後更下令盡快肅清所有妖魔鬼怪、以維持紫荊堂穩定。紫荊堂坐館大哥得令後便吩咐大法師開壇捉鬼。經過七十九日連續作法之後、紫荊堂終於回復平靜。但當坐館大哥問大法師捉到幾多隻鬼時、答案竟然是零。坐館大哥登時吃驚地追問大法師、究竟原因何在？大法師輕描淡寫哋回答話、只因他忘記帶埋個葫蘆一齊去捉鬼、所以惟有呢頭捉、嗰頭放、總之將鬼怪驅走就是。

呢嗱、話就話鬼怪已被驅走、但實際上連一隻都沒走過。成班牛鬼蛇神經過一輪重新包裝之後、便變本加厲地上演群魔亂舞、弄得紫荊堂個朵葾崩爛臭、簡直當紅家會透明嘅。總舵主知到後勃然大怒、並派遣三當家南下認真督促紫荊堂班頭目咪過食嘢唔做嘢。三當家聞得是大法師甩轆而誤事之後、便馬上版起塊面質問、開壇作法乃是神聖嚴肅之事、豈容甩甩漏漏咁兒戲？三當家當場提醒所有頭領、人人都必須要按足本子辦事、絕不容許有人擅作主、更加容不得有掛羊頭賣狗肉嘅事情發生。三當家所講的一番話、使得在場嘅一眾紫荊堂頭領驚出一身冷汗來、尤以大法師為甚。難怪他老人家今年又被嚇到淡汗狂標而臥床不起、搞到在“堂㷫”這個大喜日子裡面都唔見佢蒲頭啦！難怪江湖上流傳、今屆坐館大哥嘅格局係、不缺天時和地利、但是獨欠人緣、以致無賢士可用、再加上其剛愎自用性格而令堂務舉步為艱、所以被視為冧莊無望。另有消息顯示、大總管和大賬房均有可能被提升為下屆坐館大哥嘅傳聞並不確實、原因係本屆三大班頭皆非總舵主心儀中人物。傳聞顯示大總管返米旗相夫教子、大賬房返楓葉過他的中產生活、大法師重返笑林寺鑽研罰法、而坐館大哥則全職在家教女訓妻喎！信不信由你喇！