問個屁責

食嘢唔做嘢

膊頭又歪斜

向來衣食足

好過問人借

蚊型倉大火一燒就是四日多、而且造成消防員傷亡、確實令人遺憾。此事令在下諗起、當年褒呔拉頭纜讓所有工廈改作為不排污工業用途而催生出蚊型倉。但原來在更改變用途之時、並無立例規定安裝防火灑水系統。就係咁就過咗六個年頭、而無人過問是否安全。須然法律冇規定舊工廈必須安裝灑水系統、但亦無規定不得安裝噃！因此衙門應該在收到開倉申請時、要求對方依足防火安全規格才對。人所共知蚊型倉係一個密集貯物嘅地方、裡面存放物品乜都有嘅、防火系統一定不可缺少架啦！然而、衙門不修例、但照牌發。若責不在官、唔通又係百性嘅錯？

其實、去年已經有議員質疑蚊型倉嘅安全問題、但官爺卻聽完卻冇咗件事。好嘞、現在出咗事、就有人賴法律規管唔到。但法律係由人立吖嘛！見到有唔妥、就要主動去做嘢架啦！喂喂、大老爺、閣下食飯時、係無須要人教你夾餸嘅、係嘛？！大眾都有眼見、蚊型倉係近年頗為蓬勃嘅一類新興事業、完善法規乃是官家之責。之但係、官爺門卻關門隱事、總之夠鐘就收工。結果蚊型倉真的出事、而目仲累死消防員。搞成咁、你話死唔死？

講開又講、上次毒水事件鬧爆全城、講府大總管鵝姐領導同僚向街坊謝罪而不擔罪、已令全城皆扯火。今次蚊型倉大概又係無人應負責任。照咁睇、問責制始創人老古董塊面恐怕已經被鵝姐摑到變豬頭咯！依目前情況睇、上有政策、下有對策、關門隱事、錯不負責、問責政策、九唔搭八、翻生華陀、亦無辦法。嗚呼哀哉！