寶島何去何從？

此威當是非常威

時晨未到廢天規

與日擠眉親近美

大官唔做去擔泥

最近花佬慘議院軍萎會議員脈海奀跑到寶島、喊菜英子將軍費調升至國民生顏總額百份之三水平、加幅約百份之六十。呢嗱、寶島軍費開支要由花佬來定已經令人稱奇。但更奇怪嘅就係、軍事長見到菜英子在化連空軍基地大聲講、永不容忍別國軍機在己頭上飛來飛去、滿以為一姐要在保衛領土主權方面企硬、就快手快腳把四萬枚炮彈送往大平島去。殊不知消息一傳出花佬就唔高興、嚇得菜英子馬上派涉外部長出來解畫、並指軍事長語無倫次才會令人誤解、並改稱炮彈其實是送去東沙的。目前花佬正在向菜英子施壓、迫她交出「藍海十一段線」嘅所有原始檔案、由花佬去研究怎樣才能令阿爺聲稱嘅「藍海九段線」失去法理依據、然後再由他將藍海劃分畀佢班馬仔。聽聞話、菜英子趁在6.24出訪爸喇媽嘅機會、前去見花佬商量此事喎！

唔知到係邊個蠶蟲師爺咁大整蠱、教菜英子在經貿方面捨大圈而取冬盟。令人費解嘅就係菜英子居然連諗都唔諗、便將那條屎坑計當作為治島大方向。之但係、寶島與大圈嘅貿易佔全島經濟總額四成、加埋一成間接貿易、總數足足有五成、每年獲純利高達一千億花銀。因此菜英子捨棄大圈這個擁有十三億八千萬人口嘅巨大市場、而改選只擁有六億人口嘅冬盟作為主要貿易伙伴、未免太過一廂情願。難道菜英子以為不承認是龍裔、就可以避過某些國家嘅排龍傳統？那就難怪有人批評菜英子這套政策、等同砸寶島人嘅飯碗咯！仲有呀、那名死剩棚牙嘅賓仔一直對泰平島流晒口水、只要契哥花佬講一聲、佢就會派人登島賴死唔走、到時莫講話菜英子連屁都唔敢放、即使係日日睺實泰平島嘅安南仔亦唔敢發作至係。依我睇、以阿爺嘅性格而言、假如泰平島有乜冬瓜豆腐、街坊軍必有針對性行動。由此可見、菜英子每一個決定都會為寶島人帶來深遠影響。注於是福是禍、就得看寶島人嘅造化矣！