毒水啟示錄

一人孭鑊兩人抬

三五成群亦當災

惟有全盤皆落鑊

關人隱事確天才

毒水案一查數月、結果終於公布了！據調查報告顯示、無論兩廳（房車廳、發錢廳）、兩部（蝸居部、水龍部）、四家乘辦商、及其他所有持份者都犯錯。換言之、係人都錯就是。大總管收到報告後便馬上召開記招、並帶同有關廳部長齊齊見街坊和輪流公開道嫌。之不過、道嫌終歸道嫌、道嫌並不等同須要負責喎！據大總管所講、佢橫睇、掂睇、抑或棟篤企咁睇、都睇唔到有邊個廳部長須要為毒水事件負上個人責任。哦、原來講來講去都係要話畀街坊聽、佢哋錯、但佢哋不負責喎！相信呢種咁荒謬絕倫嘅講法、大概係只此一家、別無它號咯！

假如這種事情發生在其它國家嘅城市、恐怕所有與此事有關連嘅部門首長都要落鑊、甚至連市長都要引咎辭職至係。但很對不起、本城所奉行嘅係“人多就冇錯”這一條不明文法則。上次和尚打傘事件已經很清楚話咗畀我哋知、只要係人多勢就大、勢大就連錯都變成係啱嘅。否則又點會話、累到成個社會雞毛鴨血嘅一眾搞手之中竟無一人須要落鑊嘅呢？但好彩潮流興咁咋、假如樣樣都揸正嚟做嘅話、就算多建幾座花廳都裝唔落咁多人嘅。照咁睇嚟、無論係集體累街坊嘅政棍、抑或係集體吞噗嘅官老爺、總之賴嘢之後大家都唔使落鑊就係最好。嗱、呢啲就叫做“公開、公平、公正”喇！只有咁樣、才能夠體會得到、乜嘢係官民平等吖嘛！因此德叔雖然大大聲話、冇人可以凌駕遊戲規則之上、甚至開到聲喝班友、有例就要依、有嘢就要做、亦嘥聲壞氣。因為呢度山高皇帝遠、連阿爺都感到鞭長莫及吖嘛！唔怪得人哋話、咱家呢個特別行企區、唔淨止津貼多過底薪嘅三會尊貴好做、原來薪高、糧準、福利齊全嘅官老爺就更加好做啦！