搞退保不如建公屋

一生挨貴租

退休吊沙煲

活命靠綜緩

有糟政府糟

呢嗱、對於基層嘅燶境無殼人民來說、最冇引嘅就係排隊輪候上公屋。雖則講府話希望能做到輪候三年便可上樓、但實際上最少都要五年或更久一些。好嘞、五年過去了、輪到自己了、但薪金卻超過限額了、所以好夢成空了！咁、冇法嘞、想買樓又冇本事、惟有繼續租屋住啦！就係咁、這一生除非中六合彩、否則永遠都要做租奴。到咗一把年紀嘅時候、摸摸自己個荷包才發覺雖然挨足一世、但原來想搵多個銀出來刮沙都冇。更弊家伙嘅就係、自己所拱嘅公績金原來亦只係得雞碎咁多、如果用來交租尚可頂幾年。但當銀両花光之後又點算好呢？哦、有了、那就是去申請綜緩。到時莫講話有飯開、分分鐘仲有屋住。所以話啫、無須要迫政府搞甚麼退休保障嘅。因為冇保障就是最佳保障吖嘛！

嗱嗱嗱、以上的講嘅嘢、並唔係吹水咁簡單架！以目前城中嘅人口老化情況估算、相信不出十五年必見其效。政府口口聲聲話以民為本、但實際上就唔多似嘞。如果唔係嘅話、點解唔肯為缺水人民多建公居？點解政府有地賣畀人建毫宅、而冇地興建公屋？其實答案很簡單、那就是一個“錢”字吖嘛！官商都要賺到盡、話之你班糠鬼有冇鐵剩啦！之但係、睇遠啲就會察覺得到、衰收尾嘅原來係政府。事實上、當一個人無論點挨、點拼博、依然係到尾唔過得世嘅時候、自然會把心一橫、先將那筆雞碎咁多嘅公績金花乾花淨、然後再申向政府攤大手板攞綜緩。試問到時孭重飛嘅唔係政府、唔通係財主佬咩？從今日社會趨勢看來、係永遠唔會餓死班打工仔、但會令打工仔永遠都挨不出頭來。政府可以唔認、但社會上怨氣越來越嚴重乃係鐵一般的事實。假如係政府尚有丁點兒使命感嘅話、尚有修正嘅可能。萬一係政府根本上只諗着有死下家莊死嘅話、咁就冇乜都唔使講啦！係嘛？！