由議會雞講起

你令我不爽

我拆你間廠

鬥到失三魂

亂噏當告狀

呢嗱、紫荊城班議會雞玩嘢玩到江郎才盡、現在居然演起「唔望同富貴、只求齊閉翳」嘅無聊劇來。繼咕喱頭雀人借「開會比應酬更重要」為題、反對垃圾會主持人爭六成提早放人去應酬講得張專員之後、又輪到話咗唔嫁又想嫁嘅撞棍幫頂爺涼茶杰話、佢要去叫張專員炒施威魷魚喎！喂喂、人家張專員由老遠嘅北方跑到南方來、無非想搞個畀面派對與眾同樂、順便帶挈大家發財之嘛！你哋要去就去、唔去就算啦！點解硬係要睺住人家大杯酒大塊肉、吃得興高彩烈之際、就帶個馬桶人場當眾開大、搞到人人反胃、個個嘔餐死呀？

講開又講、垃圾會之所以有人唔妥施威、並唔係佢哋之間有乜嘢個人仇怨、而係關乎背後眾多利益集團。咁即係話、佢哋搞咁多嘢、都係為他人作嫁衣而矣！假如淨係本地投家嘅利益之爭係唔會搞到咁複雜。無奈走咗一個花大叔入來、成件事就變得混淆起來。雖知到、本地投家只係要繼續壟斷這個市場、但花大叔要嘅係在龍的傳人之間搞分化和製造仇恨、從而打亂阿爺嘅部署、繼而像對付南聯和中東諸國一樣、搞到天朝國不成國、家不成家、誓要令到龍的傳人骨肉相殘、而成就他的利益。當天朝化整為零之後、一切都必須聽令於花大叔才能夠賴以生存。嗱、我並唔係亂噏廿四架！如果有疑問、就去睇吓那些講獨組織點講啦！那群講獨人馬唔係早就要求事頭婆重啟乜乜條約和恢復本城嘅大嬰細國殖民地身份、又或是要將紫荊城變為阿尾利堅嘅一個附屬城市咩？千祈咪以為以上嘅話係無知婦孺之言、其實持有呢種見解嘅人唔係大學教授、就係大學生。在下早就講過、當花大叔落實「亞洲再橫行」這項計劃之後、除咗會將存放在毆洲嘅爛銅爛鐵搬到阿爺家門口靠嚇之餘、紫荊城亦勢必成為其反紅基地。按照今時今日嘅情況看來、如果話城中政治衝擊係唔關花大叔嘅事、我就點都唔會相信。唔知你又點睇呢？