天仙局

三家打龍通

上頂下又鬆

開槓包三門

自摸變出衝

噚日我在「瓊天」吃早餐時、無意中聽到隔籬枱三叔公同人講、日前范民、建仔、法師三人拉咗施威去金紫荊會所開雀局。臨行前、建仔仲掹埋豬柳倫去幫手斟茶遞水兼做埋跑腿。東圈第一鋪由施威起莊坐東位、法師坐南位、范民坐西位、建仔坐北位。作為施威上家嘅建仔採取影印機戰術、總之施威打乜佢就跟住打乜、誅到施威眼都花埋。南位嘅法師就起勢髮章比西位嘅范民、總之唔係供到九章、就係十二章、搞到施威包牌都包到手軟。如是者、建仔死誅、法師猛鬆、范民造牌、四圈尚未打完施威就已經清袋。施威在乾塘之下、惟有打電話畀佢老表遠平籌旗。由於施威頻頻求救而令遠平產生疑念、於是吩咐得光立即前往金紫荊會所看個究竟。

在等候得光之際、施威提議一面嘆下午茶、一面等財神到。之但係、當三人一聽聞財神就是名震竹館界嘅老千剋星得光、登時冒出一身冷汗。在暢談期間、施威忽然絞肚痛要去開大。正在揗晒雞嘅建仔馬上吩咐豬柳倫速速跑去見得光和唱衰施威、而范民就打電話急𠹭一群臨記聚集在會所門口、抗議施威賭白頭片兼欠債不還錢。期間建仔埋怨法師有餬唔截又同范民在枱底換牌、搞到施威起疑心搵得光幫拖。建仔還警告法師、叫佢在下四圈勿再喺枱底換牌、否則斷正畀得光就大家一鑊熟。法師聞言後登時發作、並反駁話最多咪唔玩、唔死得人嘅禍！比較淡定嘅范民立即打圓場、佢話只要法師間中截佢一兩鋪餬、而建仔就醒番兩三鋪餬畀施威食、但必須做得自然一些、咁就可以瞞天過海。呢嗱、究竟范民、建仔、法師三人會不會露出破綻？豬柳倫對施威嘅唱衰、以及臨記嘅抗議又能否得逞呢？得光帶來嘅究竟係活命錢、抑或係攞命籐呢？呢場牌局嘅結果又將會係點嘅呢？呢嗱、聽到呢度我剛剛食晒份早餐、現在又係時候趕返去開工喇！欲知後事如何、惟有留待日後分解啦！請呀！