講獨本色

愛發噏風不是瘋

瞓醒依然在夢中

整天胡扯添陶醉

外邊稱佢做河童

涼茶杰見過德叔之後話、泛㒼四人代表會見德叔、代表阿爺確立佢哋嘅憲政地位。本來佢嘅講話係畀本地投家聽的。點不知嗰個唔知頭又唔知路嘅痴瘋就酸溜溜咁話、泛㒼四人代表（鎏藝卿、涼茶杰、受難可、托輪李）去見德叔和要求炒施威、令到佢周身唔舒服。痴瘋指泛㒼視本城嘅選舉制度如無物、兼且做法倒退、並聲稱泛㒼爭取的應該係「真普損」和本土自決、因為問題是源於政制、而唔係個人喎！呢嗱、呢趟痴瘋又確係痴唔晒、佢一聲問題源於政制而非個人、就當堂窒到滿口㒼主嘅涼茶杰“O”晒嘴、機乎講不出話來。呢嗱、呢啲就似偽本土真講獨嘅本色喇！

談到真講獨呢家嘢、就不得不提日前華文大生會老頂周時瘋炮製嘅一齣鬧劇。佢公開譏諷支離會搞嘅六世捉光晚會係扯皮條嘅把戲、並指該會在過去廿七年裡面不斷拉攏年輕人參加捉光晚會、而且要將建設㒼主天國綱領與捉光晚會相提並論、目的就係要求年輕一代替他們去完成他們無法完成嘅夢想。周時瘋強調、支離會之所以將愛國口號和建設㒼主天國綑綁一起、就係要參與者齊齊為班老餅所提出嘅綱領背書。點不知此語一出、就氣得常無連棺材都唔抬就跳出來狂插周時瘋、仲話誰人敢膽搣甩六世捉光晚會嘅深層意義、就等同在已故義士屍身上踩多一腳。嘩、無常咁樣罵不同意見人士、似乎太份喎！坦白講、人家打正牌頭搞講獨、就梗係唔承認自己係天朝子民。既然係咁、就當然要與天朝劃清界線吖嘛！試問又有乜嘢理由去關心一些與他們無關痛癢嘅事？因此還是支離會老二鄒亨通對周時瘋講（既然道不同、大可各行各路）嘅一番話來得更加大體。由此可見、講獨並唔似係如某些人所講、只屬偽命題嚟喎！