累來累去累街坊

呢鋪阿蘭嫁阿瑞

亂制販民皆鬥累

一窟牛鬼與蛇神

帶挈全民皆受罪

日前在下同阿力在某處嘅擎天大餐廳吹水其間、遇見幾個熟口熟面嘅仁兄在隔離枱打牙較、其間聽到有人問、點解會咁失策、搞到流會收場架？阿某工頭好勞氣咁話、那是販民頻玩催魂鐘嘅結果。然而擘口仔卻慢調斯理的反問、若非亂制縮晒去蛇竇又點會搞成咁？點知拗拗下、阿某工頭矛頭一轉、便直插雙茂部主管卡啦蘇辦事不力、仲賴佢搞到連個龍門都冇人守。聽到呢度、阿力忽然問、真係咁到得？我就話佢知、以垃圾會今日嘅勢態而言、唔係咁至奇。

其實當縣府硬銷新版權法期間、網絡上已經有聲音指、此法案疑似打壓網民二次創作和言論自由、更有人將此法形容為網絡廿三兜。但令人意外嘅係、縣府裡面嘅一群大老爺彷彿人人瞓着、個個關人、完全唔當作係一回事。在議事期間、除咗十九個販仔開小差之外、也有廿一個亂仔失聯。有消息指、亂制不滿販民頻頻要求主席撳催魂鐘、搞到那些去縮蛇嘅尊貴撲出撲入冇覺好瞓、嬲起上來便索性來一招阿蘭嫁阿瑞、實行累鬥累、睇吓邊個死得辛苦啲。據說亂制認定販民跟外地商家嘅關係向來密切、絕不敢讓新版權法胎死腹中。無疑、販民嗰班滑頭友既想取悅於網民、又想獲得那群闊綽嘅大財神鼎力支持、所以咪頻玩兩面手法囉！但亂制亦唔係食齋嘅、佢哋當然知到、到咗關鍵時刻販民就會借頭借路讓議案通過。之不過咁、亂制絕對唔肯讓販民佔了便宜又賣乖、更加唔肯去做免費幫人抬轎嘅傻仔。就係咁、咪夾手夾腳鬧出這齣「寧願齊閉翳、不望人富貴」嘅鬧劇來囉！咁你話嘞、加陣兩大勢力逳吓就鬥垮鬥臭、連議會功能都被鬥到殘、唔通佢哋以為一切都係「老奉」嘅咩、吓？