垃圾就是垃圾

阿茂整餅打乞嗤

關門隱事有嫌疑

呢煲唔鹹又唔淡

勢將港人當做豬

呢嗱、俗語都有話啦、貓捉老鼠、狗看門口、本來係各司其職嘅事。但係剛剛就發生咗一件狗捉老鼠嘅事。話說、有幾名垃圾會尊貴被指涉嫌私吞獻金、正當清天公署展開調查之際、垃圾會卻另起爐灶、搞咗個甚麼「調茶委員會」去跟進。好嘞、閉門調茶完畢、結果就係無證據顯示有人行為不當喎！嘩、收咗人家嘅禮金、仲存埋入自己個私人戶口半年都冇唔出聲、又冇向垃圾會申報利益、咁都話冇有錯。喂喂、真係咁都得？更加令人眼冤嘅就係、在發布會上正副主席兩人形同貼錯門神、仲刻意擺出一副互不妥協嘅態勢出來吖嘛！

坦白講啦、嗰班垃圾尊貴所做嘅嘢、實在令人費解的。人家清天公署早已開咗「快佬」調查此案、垃圾會又無端端搞套自己友審自己友嘅鬧劇出來獻世、結果仲話冇人犯錯添。咁搞法、分明係衙門尚未開堂、尊貴先行判案。呢嗱、雖然話呢班大帝有特權、但亦恐難封得住悠悠眾口。換轉係普通市民公開對此案指手劃腳嘅話、恐怕早就犯上妨礙司法公正之罪啦！係咪？！如果心裡面係光明正大嘅話、點解唔可以耐心等待清天公署嘅調查結果、而急着要提前締造出一個既定事實出來呢？人家巡捕房開設捕快投訴科來調查捕快被投訴個案、嗰班垃圾尊貴就忽然關公上身、一口咬定自己人審自己人係唔公平嘅。現在呢班垃圾尊貴又係自己人審自己人、唔通咁就公平咩？咁搞法、同「只許州官放火、不准百姓燒香」有何分別？呢類寬己嚴人嘅所為咪就係「有政治、冇道義」嘅實證囉！之不過咁、所謂天下烏鴉一樣黑吖嘛、政治本來就係咁污穢嘅、睇怕都唔介意得咁多。但問題係、紫荊城嘅政棍吓吓拿市民嘅福祉來教飛、咁就係神枱貓屎、神憎鬼厭啦！係嘛？！