好頭不如好尾

有着要爭先

人倒勿怨天

錢財裝滿袋

飲水要思源

兩年前、超人集團大老闆老李嘅公子小李涉嫌在大圈違反建築條例、而遭當地衙門檢控、事後老李在小李生日時給他一封大利事作為補償。去年老李在大圈撤資嘅消息不脛而走。今年暑假期間、大圈喉舌不斷指責老李食碗面反碗底、而連日來大圈網民亦齊齊在互聯網上口誅筆伐、並冠以他一個「李較腳」稱號。日前老李終於開口回應事件。他說、不是不想對那些抹黑他的謠言作出反駁、而係唔想在阿爺跟奧黑馬講數期間加添壓力。老李還聲稱自己對十分看好大圈發展、而且很佩服阿爺嘅領導才能、但同時亦指那些攻擊他的文章今他不寒而慄。有人話、老李拿阿爺來話說、委實太過大口氣和過於自負。到底事情又係唔係咁嘅呢？咁就真係見仁見智喇！

早幾日前、素有「吊吊捹」之稱嘅唐少開口撐老李。佢話自己跟老李及一班金紫荊愛大圈生意人、都是在八十年代便開為大圈工商業建設作出貢獻、並為大圈今日能夠發展成為全球數一數二嘅經濟體系而感驕傲。唐少暗示、食碗面反碗底嘅並非金紫荊愛大圈商人、而係那些盲目狙擊老李嘅大圈喉舌。呢嗱、唐少嘅講話嗒落有點異味、似乎仍然念念不忘在上次小圈子擂台大戰之中、阿爺拉閘放狼將他咬到遍體鱗傷一事。唉、唐少呀、唐少、閣下只記被狼咬、但係點解唔諗吓你在阿爺嘅地頭搵咗幾多銀両呢？在下時常講、呢個世界只會對那些非貧非富嘅人唔公平、對於爾等一類富人來說、係絕對公平既、只係有人唔曉得感恩啫！依我睇、假如阿爺檔攤全無投資價值嘅話、恐怕閣下都唔會瞓身落去啦！係嘛？如今阿爺嘅聲勢在國際上如日中天、而閣下份身家亦以倍數暴漲、咁咪各得其所囉、算起來誰也不欠誰。正所謂、合則來、不合則去、還有啥好計算呢？