問幾時釘蓋

問吓唔使死

提早返屋企

臨場喫火药

收工食滷味

常聽聞人講、國之將亡必有妖孽。計我話、紫荊之將枯萎完全係業由自取。雖則話、縣首冇得揀啫、但係尊貴總算有得揀吖嘛！但係選咗之後才發覺、原來有冇得揀分別不大。因為在垃圾堆裡面揀出嚟嘅嘢本質上就係垃圾、而垃圾絕唔會變成臘鴨、但係縣首卻會變成垃圾矣！

日前在垃圾會進行吹水答問大會期間、癲教頭忽然聲稱、話自己受擁躉之托問縣首幾時釘蓋、而縣首則祝他長病百歲….喔…. 對不起….應該係長命百歲才對。結果問嗰個提早收工反屋企、而答嗰個就繼續吹水。呢嗱、垃圾會開會猶如大笪地開攤早已經係常態化、那些甚麼吊吊捹、狗噏、曲街、杏加橙等形容詞滿天飛唔在講、掟蕉、掟飛機、掟路姆犀公仔亦屬家常便飯、但係今次嘅「爛文化」交流為之最精彩。其實當癲教頭發問時已經有其他人向主持人六成哥提出抗議、但六成哥卻認為縣首可以作答。之但係、問人幾時釘蓋分明係一種人身攻擊、相信一般人都唔會認為係恭維嚟吖嘛！因此坊間陰媒論指、六成哥有可能早就想替佢細佬七成哥向縣首問同樣問題、但礙於身份問不得而矣。然而、今次癲教頭正好開正佢嗰瓣、在一為神功、二為弟子之下、六成哥當然要成人之美啦！喂喂、咁講法、六成哥這位主持人豈不是有假公濟私之嫌？不過咁、若非如此、垃圾會就冇資格被稱之為垃圾會啦！係冇？！