癡瘋個唱

你狂我又狂

老鼠咬豺狼

一經時運到

曱甴也封王

上次阿爺走訪花旗嘅同時、癡瘋哥也率領兩名隨從（戰中廷、看更李）前往彼邦跟阿爺打對台、但到步後才發現稍有身份嘅人都跑晒去摱阿爺車邊、結果在飽受冷落之下面懵而回。不過今次機會又來了、日前癡瘋哥在阿爺訪問英吉列期間、同步在彼邦幾家出名嘅大教館展開巡迴演唱。據說今次他不獨只唱阿爺違背「離合聲明」唔畀紫荊人「普損」、仲唱阿爺做生意無誠信、並警告英吉列勿跟阿爺簽貿易合約喎！唉、英吉列正在鬧水荒、適逢阿爺拉條大水龍過去放水、而且連事頭婆都要出動全家三代迎接阿爺、但居然在此時有條茂利彈出來喊人唔好飲水喎！點知佢呢頭話口來完、嗰頭就有消自傳來指英吉列跟阿爺簽咗一將價值三千六百億両銀子嘅托水龍大單。由此看來、傳聞指癡瘋懵到上心口、原來係有根據嘅。

講開又講、如果話阿爺連續兩次出訪番邦、都碰上癡瘋哥又在彼邦出現係巧合嘅話、我睇唔會有太多人相信嘅。若然話、這一切都是番邦刻意安排、那就意味著洋鬼子心理上有點不平衡了！洋鬼子呢頭為撲水而拼命討好阿爺、嗰頭又找來一條頂心杉篤眼篤鼻、難道有人天真到以為拼命將癡瘋哥與阿爺湊在一起、就可以令阿爺受到感染變成一隻曱甴乎？花旗嘅「時代兜刊」夾硬將癡瘋這隻舢舨當成巡洋艦擺上台、已經係居心叵測架喇！現在又輪到英吉列嘅牛精大教館邀請呢位番文成績不便透露嘅癡瘋哥前往彼邦演唱番歌、擺明志不在聽佢發噏風嘅啫。咁搞法、分明有心敷衍紫荊城裡面嘅一群情緒陷於失落嘅「講櫻娛業」至喎！呢嗱、紫荊人有句老話叫「冇咁大個頭、唔好戴咁大頂帽」、意思即係話、啃唔落嘅嘢就唔好夾硬啃、否則有乜「衫長褲短」都唔會有人可憐。一名茄哩啡忽然被推上大舞臺當起大歌星來、自我膨脹在所難免、怕就只怕小子難擔大旗、萬一唱唱吓哮喘發作、以致度氣唔上唔落翻不過來嘅話、咁就一世架喇！知冇？