小心拖出禍來

有錯必須認
唔好兩頭擰
有法不依從
遲早爆鋪勁

在去年「和尚打傘」期間、大撞黨成員水佬超涉嫌從高處向捕快灑下「陽之甘露」而被捕。有人用手機拍得水佬超在被押送期間涉嫌遭七名捕快毆打。事件至今已經過咗十個月時間、但刑部衙門依然未有提出檢控。據刑部袁大總管透露、待米字國大狀師提供意見後就會有所決定、並強調假如意見清晰、就不必等待巡捕房提供資料都可以展開行動。呢嗱、唔知各位街坊點樣去看待此事、但在下就覺得唔多妥。因為聽落之後感覺上係巡捕房拖延呢單畸屎嘅進度多啲喎！咁咪即係暗寸新任總捕頭冇料到？

隨着水佬超被毆打事件暴光之後、他的背景資料就在互聯網上被人披露、當中涉及嘅範圍頗為複雜、究竟有幾多成係真嘅亦無從估計。傳聞指水佬超唔止係大撞黨成員、而且仲係開心署轄下摸你銀山戲水池一名基層公人、職位係池邊睇水員、亦是一個活躍於灣銅區而且無註冊嘅F字頭幫會旗下一名卒仔。之但係、無論水佬超嘅所作所為係幾咁可惡、無論捕快係幾咁憎恨他都好、總言之動用私刑是不能接受的。作為刑部大總管嘅袁老爺理應揸正來做、以免觸發起公眾疑慮。所謂聽取米字國大狀師意見恐怕只是藉口、巡捕房遲遲未肯提交報告才是真的。由於這麼樣一拖、社會上不停有人質疑是否有人要博大眾失憶、而利用時間去沖淡件事？無論這類猜測是否正確、但在形象上來看刑部衙門嘅信譽已經受到質疑。若然不盡快將此案交由法庭去判斷嘅話、整支捕快隊伍聲名受損唔在講、甚至連「法治之都」這面唯一令紫荊人感到光彩嘅招牌都保唔住架喇！知冇？