2015年8月5日星期三

誤判玄機用錯神


一人卸膊眾遭殃
學生作亂已為常
端端學府龍蛇集
回頭再望更心傷

江湖上有傳聞指出、大教館長老會早已準備好否決戰中敏教頭嘅晉升議案、只是揸拂長老金刀老大唔想喺臨退隱之前孭起呢隻鑊才一直拖延。換句話講、即係金刀老大嘅拖延、間接向有心人提供鼓動大學徒犯上作亂嘅機會。在今次事件之中有部份長老受到身體上嘅損傷或心靈上嘅驚嚇、還有一位長老劈炮而去、都可謂人算不如天算矣!如果傳聞屬實嘅話、金刀老大豈非受人之託壞人之事?即使係咁、想甩身都唔係咁容易。現在就有人提議金刀老大冧莊一年、待事情搞妥之後才退隱。呢個故事話畀我哋知應做就要做、決不可拖泥帶水搏甩身、否則偷雞唔成蝕揸米架咋!

話時話、政棍搞對抗就話為名、為利、為著數啫、但那群大學徒冒天下之大不韙以暴力方式去替戰中敏大教頭出頭、到底知唔知到為乜架?保皇派之所以保皇、無非是希望獲得萬歲爺嘅封賜、以及在江湖上行走時能夠獲得某種特權和待遇。反對派之所以反對、當然是希望透過鬥爭手段博取民眾支持、從而獲得更多籌碼去跟朝廷討價還價、目的當然亦是離不開權力和名利。講到跟山姆大叔眉來眼去、又豈只是飯盟一家呢?然而那群自以為擁有偉大理想嘅大學徒居然無視法紀、屢屢做出一些法理所不容嘅惡劣行為出來丟人現眼、到底有沒有反省過是否掉進有心人設下嘅圈套而不自知嘅呢?話到尾、紫荊城都是一個以法制健全而馳名世界嘅大都會、而且金紫荊大教館更加是一所被視為專門輸出精英嘅百年老號。但勢難想得到今日嘅大教館居然淪落為一個充戾氣和崇尚暴力嘅九反之地。究竟點解會墮落到呢個田地?依我睇、若說是長老會受壓於紫府而令到大學徒冇彎轉嘅話、倒不如話係大學徒學壞師來得更具說服力。係冇?!!

 

 

18 則留言:

  1. 學生充滿熱誠同理想,加上腦筋單純,容易受人影响,具備咁優厚條件你都唔利用就真係暴殄天物囉!所以近年好多示威同遊行,都有學生參與!

    回覆刪除
    回覆
    1. 從學生嘅堅定程度看來、他們的思維必定是經過長期被薰陶才會變成咁的。

      刪除
  2. 大學徒未出來搵食,通常為名不為利,友儕間的認同,加上衝動又無知,在有心人的部署下,自以為所作所為是替天行道,更要係轟轟烈烈,才可以名垂千古。

    回覆刪除
    回覆
    1. 講起替天行道、在下想一水滸傳嘅宋江、此人以為自己帶領一零八名好漢走上青雲之路、結果原來是死路一條!英雄尚止如此、狗熊也!

      刪除
  3. 人在江湖,想明哲保身,這談何容易啊?
    都係嗰句,第一步如果行錯咗…以後都幾難返轉頭。好似就以武制暴,意思咁即係話仲有排打打殺殺了!

    回覆刪除
    回覆
    1. 今日大學徒會一哥話、當日衝擊長老會並非大學徒所為、所以唔認錯。到此在下才明白、原來呢班大學徒係唔知到 “ 我雖不殺伯人、伯人為我而死 ” 呢句嘢係點解嘅。

      刪除
  4. 域兄晚上好 ,
    大學徒喎 , 讀聖賢書,所為何事?真係冇眼睇 。

    議而不決又一例
    決而不行更濕濟
    相方理據各堅持
    攪到學徒發狼戾

    回覆刪除
    回覆
    1. 華娃兄、有人叫呢班友仔去讀屎片好過喎!

      人唔到位錢到位
      有班高人扮矮仔
      公幣專養大泡和
      紫荊人民冇眼睇

      刪除
  5. 今天我又忙樂,忙這忙那...冇時間上網回覆大家喇喂
    ★°¨♦好友•`☁✬晚安✫☾•*good night 甜夢✬*¨★瞓覺先呢

    回覆刪除
    回覆
    1. 神鳳工夫長過命、不用太急、慢慢來吧!

      刪除
  6. 又係雞蛋和雞的故事
    是教之過
    還是學之過

    回覆刪除
  7. Long time no see.. 近况如何呢?

    回覆刪除
  8. 只是不明白為何一間學校要有那麼多副校長. 眾多副校長又要一個首席副校長, 係咪南郭吹簫之輩呢?

    回覆刪除
    回覆
    1. 這是前朝定下來的規舉、有人話係分豬肉、藉此穩住一群精英。

      刪除