戰中之地震先兆

既然大夢要成空

不如盡快打衝鋒

諸君莫問誰之過

一炮轟來便建功

前幾日鐘區戰場發生一宗明修棧道、暗度陳倉嘅騎呢事件。當時有一班人託辭到話事堂前表決網23、但原來集齊人馬之後不是開會而係突擊話事堂。更令人意外嘅就係、當話事堂大門被攻破之後、除咗一隻盲頭污蠅飛身而入之外、其他人通通卻步於門外、根本毫無攻佔嘅意思。燶黨嘅飄紅哥欲制止卻被人捹開、事後射蚊連嘅毛毛哥公開指責有關行為、而拳頭幫嘅大隻哥要求有關負責人企出嚟承認責任。另一方面、鶴雲之潮嘅壇主神蜂哥又煞有介事的指當時在場捕快人數比平時銳減、大有暗示巡捕房勾結黑幫架禍之意。不過咁嘅講法、恐怕連佢自己都唔會信囉！

江湖傳聞指總舵主早已洞悉番邦一直想找藉口予以表面抵制、實質是要翻閹64後在枱底踢索狂撈着數嘅滋味、所以早就向紫荊堂頒下明確命令、必須以「不見紅、不讓步」嘅方式冷處理此事。傳聞指總舵嘅意思是先行陰乾雨遮黨、然後再對付混水摸魚嘅群體、從而堵塞番邦抵制嘅藉口、以及讓紫荊人好好上一課、祈望日後會學乖一點。因此神蜂哥對巡捕房嘅指控純屬無稽、所以不必太過認真。這兩天兩遮黨內嘅反盟和烈血幫互相指責、足以證明這次衝擊是其中一方嘅作為。試想想、雨遮黨至今還是賴在戰區發吽哣而不退、巡捕房方面又毫無動靜。試問再拖落去、最吃虧的又會是些甚麼人呢？打從表面上睇、首當其衝的固然係一眾大小商戶、但如果再睇深入一層、就不難見得到其實還有人損失更加慘重、再加入番邦因素之後、相信唔使問阿貴都知到點解有人急於速戰速啦！係嘛？

在下一開始就講過、這場所謂落地開花嘅革命早就注定有輸冇贏。請看看戰狼三伯一見勢色唔對便半途蹆軚、大主教借故拂袖而去、大聯與反盟講雙方只希望犧牲對方利益成全自己、被人捧上神台嘅神蜂哥連自己踩咗屎都唔知到、雨遮黨內醞蘊藏嘅無間道比大學徒更多。試問一群各懷鬼胎嘅人馬聚在一起又點會幹出好事來？今次事件只大地震之前嘅先兆、好戲尚在後頭。信不信由你。