捕快反戰中實屬不智

捕快反戰中

難以定吉凶

不驚無路退

最忌褲穿窿

早前縣太爺講、公人是市民一分子、有權以個人身份去支持反戰中、而巡捕房刀頭協會亦隨後表示、捕快以個人身份支持反戰中不會違反捕快通例。不過飯盟就唔係咁睇、民間反對團體嘅反應亦相當緊張、因此人民公被嘅飯盟代表立即寫信給總捕頭、要求他就捕快支持反戰中一事作出解釋。

呢嗱、當年細樽老人生前曾經答應過紫荊人「錢照賭、女照泡」燈紅酒綠維持五十年不變、但後來有人話畀我知、原來這句話結尾還有「至奇」兩個字未被發現。就係咁、紫荊城就陷入多事之秋。俗語有講、一朝天子一朝臣吖嘛、受政治委任嘅管治班子一上場便打正愛閣愛講旗號是國策所限、人們理應以平常心視之。假如各個政策部門首長和各及公人齊齊放棄政治中立、那就認真不妙。就以巡捕房為例、如果巡捕房伙計一旦放棄中立而去支持反戰中嘅話、咁就聽捉蟲都得喇！事關縣府容許捕快支持反戰中、即係容許一群行使公權嘅公人將個人政治取向融入實際行動、那是十分危險的。因為捕快嘅選擇不一定是合乎縣府願望的。如果係咁嘅話、巡捕房勢張會變成紫荊城社會嘅縮影、日鬥夜鬥至死不休。因此、在下斗膽講句、飯盟聞得捕快支持反戰中便嚇到鼻哥窿都冇肉是假的、他們連高慶也來不及才是真的。因為捕快可以選邊站、其他公人亦可以、因此社會上嘅矛盾就會被帶入縣府衙門、到時問責班子絕不會是跛腳鴨、而係米田共。紫荊城將會變成點？唔使問阿貴都知啦！係冇？

今日反戰中聲勢已經淹沒了戰中的聲勢、既然擁有這麼龐大民意基礎作後盾、實在看不出何解還要將「捕快政治中立」這塊金漆招牌毀掉？在下總覺得捕快表態支持反戰中是百害而無一利。咪話在下又講埋啲衰嘢、呢單嘢如果唔係有人被勝利沖昏頭腦嘅話、就係蠢到無藥可救、保管一定會弄巧反拙。唔信？那就等着瞧啦！