狗屁標準

既是勢難更

何苦強相爭

街頭無怒火

做反有書生

呢嗱、近期「標準」呢家嘢忽然之間在城中熱起來、街坊講、官方講、甚至連大代會（大人代表大會）都講。喂喂、唔講起都冇留意、原來紫荊政壇一家標準三家說法。第一家：「國際標準」。第二家又係：「國際標準」。第三家都係：「國際標準」。呢嗱、呢三句嘢聽起來確係一樣、之但係白紙黑字寫下來就有天壤之別了！首先係普羅大眾認知嘅「國際標準」、其次係政府執行嘅「國製標準」、最後嘅係政客奉行嘅「各製標準」。由於坊間、政府、政客所持的標準存在着嚴重分歧、難免出現雞同鴨講嘅現像、結果當然係有標準等同冇標準囉！

日前大腰廷教頭警告、如果大代會公布的「普損」不符合「國際標準」嘅話、便馬上啟發戰中。不過依我睇、大代會擺上台嘅「荒案」一定會令大教頭七上八落、下不了台、到時戰又死、唔戰又死架喇！縣首嘅「羽園藝術」在大代會發表得淋漓盡致。他說「歸本法」就是違反「國際標準」嘅產物。因為世界各地「損舉」只限本國國民才可以參加投票、而咱家「歸本法」卻容許非本國國籍居民在各項「損舉」之中投票。他還說、大教頭所堅持的「國際標準」就是要奪去外籍居民嘅投票權。咁講法、分明暗寸大教頭係盲頭污蠅啫！

呢嗱、紫荊政壇之所以人人掛羊頭賣狗肉、無非是利益使然。朝廷嘅「國製標準」是用來阻擋外部勢力入侵教壞班龍子龍孫。政客泡製出來嘅「各製標準」是自己地盤和利益嘅護身符。因此「國際標準」的唯一用途、就是當對手死後用作「道德之旗」蓋在他的棺木上。所以話啫、紫荊城係老千世界、所謂嘅「國際標準」分分鐘唔係「國際標準」、千祈不可太認真、更不可盲目追隨、否則死咗都唔知乜事、恐怕連旗都冇得冚架！