不談會麵只講臘腸

我喊你來你不來

今天又想共一枱

物換星移天地轉

刁橋扭擰嘆哀哉

俗語都有講、蘇州過後冇艇搭吖嘛、上次人家九省巡案余掟星大人帶埋個京城第一大廚南下、並主動邀請盟主派頭領過府吃「會麵」、點知班友仔個個刁橋扭擰、仲齊齊玩唔畀面。就係咁、嗰餐「會麵」益晒保主派。點知日前飯盟忽然又喊着要食「會麵」喇喎、主人家當然馬上答應、之不過陪他們吃「會麵」的並非九省巡案、而係西灣府尹張小明大人。換言之呢餐「會麵」再唔係出自京城第一名廚之手、而係由本地嘅英記大牌檔提供嘅外賣而矣！

呢嗱、所謂唔怕唔知、最怕無知吖嘛！呢邊廂盟主派公開索價、如果朝廷拒絕接受「三鬼荒案」嘅話、他們就惟有跟隨小三子一起「戰中」去也。看來、飯盟是企圖利用「戰中」去要挾萬歲爺。喂喂、咁搞法究竟work唔work架？不過那邊廟鄭工頭就放話嘞。他說當下是食「臘腸」嘅季節、吃「會麵」已經過時、因此朝廷不再提「會面」只談「臘腸」喎！他補充說「各家安全」是政策、朝廷寧願見到「戰中」也不答應讓那些打着「結束一檔獨賣」旗號嘅人物登上知縣寶座。在下不知到鄭工頭所講嘅話是個人意見、抑或是以上院參事的身份發表。假如是後者嘅話、那就是說朝廷已經兜鎚定音、再無商量餘地、亦即係話、如果盟主派不吃朝廷提供嘅「臘腸」嘅話、就啥也不用吃了！

朝廷之所以硬凈成咁、無非是白頭周領導嘅「反戰中」簽名運動所取得嘅成績、以壓倒性姿態領先「戰中」所取得的成績所至。既然擁有強大民意基礎作後盾、朝廷自然出師有名。呢啲咪就係有部署與冇部署嘅分別囉！人家「反戰中」一開始就係睇住「戰中」條數來食、而且爭取「聞煮」呢家嘢、淨係齋講理想係冇用嘅、一定係財雄勢大的一方贏。呢啲就係現實吖嘛！過去如是、現在如是、將來亦如是。假如今次雙方搞嘅簽名運動係「普損」嘅話、飯盟就係以三十五萬票之差落敗咗架喇！以目前形勢看來、如果勉強將「戰中」這套鬧劇擺上台嘅話、下場大概與1967年阻派演的那台「六國大封相」鬧劇（開始時靜坐、繼而遊行和喊口號、最後到處放置土製炸彈和掟菠蘿）嘅下場差不了多少。在事發之初、阻派是獲得市民同情、當事件演化成暴亂和引致整個社會動蕩不安既時候全城市民切身利益便受到損害、因此人們便開始對阻派不滿、最後還視之為街老鼠。如果飯盟唔想歷史重演、唔想步其後塵嘅話、就應該好好的計算一下了！市民係好現實嘅、今日支持你嘅人、就是明天要打倒你的人。唔想衰就快啲墊高個枕頭好好的諗清諗楚啦！知冇？