口噏噏當秘笈

平時頭耷耷

隨口當秘笈

幫忙唔到埞

到埞聽執粒

日前大賬房掌櫃二撇曾忽然聲稱、無論在食飯、睇戲、行街、甚至乎上廁嘅問題上、咱家縣首都係直接向市民「問」責嘅喎！在下不知到二撇曾是否一邊擁着佳人聽古典樂、一邊飲紅酒搞大咗…喔…對不起、應該是飲大咗、所以連講話都講到一嚿嚿、總之聽完他講嘅話之後就有種周身唔老嚟嘅感覺。咁、係吖嘛、人家當一國之首也要向人民負責、然而咱家區區縣首居然向市民問起責來、這到底是那一門的玩意呀？

呢嗱、若非二撇曾將「問責」與「負責」嘅位置倒顛咗嘅話、那就係有心贈「」都未定喇！記得當年老古董上任縣首之初、衙門內根本無人聽佢支笛、即使在他身邊的那群隨從亦是皮笑肉不笑、幸好後來得高人指點、教他在每名隨從上頭套一個問責箍、才能夠令到每個人都學懂服從他。之不過當時那位不甘屈居老二嘅陳四姑就登時不服氣、結果黯然離開縣府轉戰江湖去矣！唔知我咁講大家是否明解、不過冇所謂、事關今日社會明即是不明、不明即是明、總之心照就是。

講開又講、縣首能否做到向市民負責各有不同睇法、但如果講話有堆人好唔 likey 縣首、相信冇乜人會有異意。原則上除咗朝廷有權向縣首問責之外、市民也可以咁做。之不過並不是每個人都有本事運用這種權力、即使集眾之力大興問罪之師亦是徒然。歷史證明、當年有五十萬基層大眾跑上街一齊報以噓聲、咱家老縣首依然絲毫不損、但萬歲爺在隔離埠求其開口講一聲之嘛、就有人忽然腳痛、兼且嗱嗱聲將自己摺埋。吓、點解萬歲爺無端端會咁樣對待老縣首？絕對唔係無端端架、原因就是有一次老縣首同你哋嘅老闆開枱打麻雀、叫「五八萬」食咗炸糊唔認賬、於是你老闆便派人在萬歲爺面前告他一狀、結果咪搞成咁囉！這件事告知我們、雖則話市民可以向縣首監督兼問責、但並不是人人有咁嘅能力。因為並不是每個人都能夠請得萬歲爺開金口架！難怪連二撇曾都睇唔過眼、借頭借路兜腳踩爆未來縣首並不是向你負責、而係來問你個責嘅。喂喂、咁樣講嘢又會唔會唔覺意焫着埋戰中把火架？