唔反告就笨

被人老屈去踎監

幸好終堂話我啱

終於洗盡寒酸氣

欲索賠錢要大膽

呢嗱、嗰頭黑金黨全部獲放生、呢頭雙殼三𡃁又獲無上堂放生。按照目前發展嘅軌跡睇嚟、下次應該輪到荔枝櫻、跪地妝、涼茶杰、鐵頭人等一眾黃亂頭領都會獲放生。對於黃思來說、都可謂得回一個清白、唔使再被街坊冤枉係看奸酒狗、確係可喜可賀喇！其實今次嘅判決並不令人感到意外。因為無上堂六判爺辣到麻早前已經放話、指高級堂對此案嘅判決大有問題。當時心水清嘅街坊就料到雙殼三𡃁洗脫距離沉冤及重見天日嘅日子不遠架喇！問題係、唔知身在北驚城嘅阿爺點樣睇今次嘅判決。不過、就算阿爺唔鍾意又點？案到無上堂、一判成鐵案吖嘛！家陣你吹咩？！

嗱昨晚在榕樹頭聽三叔公講起此事。佢話今日罪惡城嘅勢態係官商鄉黑政大團結嘅利好現象、直程係當阿爺透明。但奇怪嘅就係、三叔公被聽眾問到究竟係北驚的阿爺還是北尾阿爺時、佢居然叫聽眾自己估吓。但在下卻聽得出、當下罪惡城嘅揸拂人及一眾頭領究竟係效忠那一位阿爺、連三叔公都搞唔清楚。照咁睇嚟、眼見確實不能當真的。早兩日前那位剛過氣紅三爺雙失缸聯同講馬廠總管雙料鳴、罪城揸拂人冧井、以及一眾負責處理罪惡城和梳打城事務嘅各部主管齊齊亮相之後、本城就出現兩件黃思大喜事、難道真係有咁啱得咁橋？嗱、如果我係雙殼三𡃁嘅話、一定唔會白白被人屈去做咗一輪監躉而不加追究嘅。起碼都要揸拂當局賠賞精神上、肉體上、以及名譽上嘅損失。嗱、即使每人索唔到十億八億、都要攞番三幾千萬才算數！否則就告到去花京喪普爺爺面前、睇吓揸拂人賠唔賠。嗱、我唔係靠嚇架、只係想提醒冧井一聲、速速賠款兼認錯為上。萬一被三𡃁告入、被花奇強力部門嘅人𢯊過去坐「花」廳、咁就唔好啦！係嘛？！