盡是假惺惺

耍完邋遢嘴藐藐

老點不怕眼眉調

人前擺出相對罵

關門隱事笑彎腰

初二零晨、我跑到榕樹頭夜店參加夜鬼會搞嘅架忌冷團拜、咁啱又與阿黃和阿藍兩位尊貴同枱。在傾偈期間、我問阿黃點解要提出取消烟火晚會、而唔取消埋花車遊行？阿黃話、花車晚會是飛雞公司出資舉辦、冇得阻止。我再問阿黃、點解會有取消烟花匯演嘅念頭？隔籬嘅阿藍勿然插口話、死咗咁多人、唔係表示一吓哀悼都唔得吖嘛？我記得阿藍都有份喊停烟火晚會、於是順口問佢點解唔留在家中哀悼而要參加團拜。阿藍話、已經哀悼咗、無須日日都哀悼喎！我問佢哋、搞到全城街坊冇烟花睇、累到酒店爆發退房潮而蒙受損失、但佢哋就跟我一齊醉生夢死、究竟對唔對得住班街坊架？那時剛好第一道菜上枱、於是大家齊齊舉杯喊飲勝。我在想、佢哋嘅做法、跟諸葛亮在柴桑吊慰（假惺惺）有何分別？

坊間質疑、假如那趟大炒車意外蒙主寵召嘅只有一兩個人嘅話、垃會尊貴和中廠（揸拂堂）仲會唔會搞咁大壇嘢出來掁街坊雙眼？嗱、在下並非冷血之徒、只係有話直講。罪惡城當下嘅環境就係、政治掩蓋理性。尊貴盡其嘩眾取寵之能事、逢水必抽。揸拂堂高層害怕自己變成政治箭靶子、無論尊貴提出嘅要求有理冇理都好、總是就得便就神仙庇佑。在過去十二個月裡面、因患流感而升天嘅人超過一千、但垃會尊貴從未有提議過為死者哀悼、中廠又冇為佢哋下半旗至哀。講穿咗、無非是患流感病人斷斷續續升天嘅情況並唔似得大炒車咁、一次過走咗十九人來得咁震撼吖嘛！嗱、三年前嘅黃亂為街坊締造出一個「人多勢眾就是道理」嘅錯誤觀念。今次中廠進退失據、除咗給與人一種「核突」感覺之外、還令人覺得揸拂堂是一隻「藥」雞。難怪阿爺早就臭到一𠹻藥𡃴、以致先下手為強、下令西廠（西灣辦）𠸎中廠撻成一塊、實行做揸拂人嘅黐身膏藥啦！今年嘅團拜使我認識到、阿黃同阿藍雖然在台前互相對陣、但在台後原來係 friend 過打 band 嘅。照咁睇、大眾無需擔憂大和解辦不來了！