過橋咪𨃩

和諧進取兩皆空

武林猛人把我哄

欠債多多冇力還

好在阿爺合西中

昨晚在榕樹頭聽三叔公講、打得姐日前擘大雙眼發開口夢。打得姐透過空氣電波放話、佢開拓嘅大和解進展非常順利。打得姐自稱係順得人、反派一個飛電、佢就立即出現。反派叫佢到垃圾會、佢就唔敢去行企會。反派叫佢講東、佢就唔敢講西。一切依足吩咐、一點也不會多、一點也不會少、務求“就”到反派滿意為止。呢嗱、雖然我唔係親耳聽到打得姐講這番話、但由三叔公轉述出嚟、係應該有份量嘅。但問題係、點解身為中廠揸拂人嘅打得姐、居然會將自己形容到成個任人擺布嘅扯線公仔咁款、究竟其目的何在？

三叔公話、有心人知到要抬打得姐入主中廠嘅話、一定要先將強悍嘅掃把姐剷除。因此有心人設個局抬歷史上最廢嘅阿𠾍哥出來、使得阿爺禁止掃把姐跟打得姐爭凳仔、然後讓打得姐集中力量對打殘阿𠾍哥。結果有心人一計得逞、打得姐順利當上中廠揸拂人。然而、當打得姐入主中廠之後、才發現原來每日都有好多親家上門索債、搞到佢周身唔掂。因為五大武林世家、十三家會館、十八個大寨合共卅六路人馬、皆透過黃藍兩族尊貴不停的向她施壓、要求將條船靠向各幫各會嘅水路航行。在咁嘅情形下、打得姐當然應接不下兼擔心會被搭沉船。當下形勢係、順得哥情失嫂意、點做都死硬嘅。幸好打得姐畢竟係前朝精英出身、而唔係浪得虛名嘅人。佢借助孖葉台嘅大氣電波向北方千里發功、好讓阿爺得知佢嘅艱難處境。於是乎、西廠大當頭一十一哥就奉名踩入中廠和打得姐拍住上。此招一出、成班武林名宿當堂踩晒屎。嗱、三叔公話、講到呢度夠鐘收檔。佢仲話、多謝各位街坊捧場、下回再講喎！