大龍鳳前奏曲

戰中不遂搏偷雞

煽班門生再起圍

收起天書鬥法寶

慢調斯理壞天規

政治呢家嘢既黑暗又污穢、但無疑是一面能夠將政棍嘅醜惡嘴臉照得一清二楚嘅照妖鏡。日前「戰中三縮」之一嘅戰中廷公開喊話、指稱歸本法只規定垃圾會尊貴必須擁護歸本法、但並無闡明參選人都要擁護、故質疑選委會阻擋泛獨參選人入閘係濫用權力喎！唉、戰中廷呀、戰中廷、你老母湊大你咁辛苦、點解你總係學而無術嘅呢？試問、你阿媽嗌你喫飯、你係咪淨係扒飯而唔夾餸嘅呢？須知到世界上唔係所有有關連嘅事物都要續一闡明、因為人係有普通常識吖嘛！在下決不相信閣下不明此理。唯望你老哥合埋貴口、放過班後生仔吧！

講起選委會又真係幫唔落嘅。佢哋呢頭話要阻擋泛獨人馬參賽、嗰頭又放一班蛇頭入閘、而被拒諸於門外嘅人、除咗個別人士較有殺傷力之外、其餘都是泛泛之輩居多。雖然坊間流傳選委會抓小放大、但無人講得出點解。呢單嘢咁多矛盾、如果我話冇蠱惑、你又信唔信？在下實在想唔通、選委會明知呢種毫無準則嘅處理手法不僅招人話柄、而且會帶來一連串法律訴訟、但係偏偏要咁做。萬一因敗訴而須要推倒重來嘅話、豈不是勞民傷財兼嘥氣？不過有些心水清嘅坊眾卻認為、選委會嘅做法肯定會拖累現任金紫荊揸拂人。因為這麼樣的一件大事都搞到一塌糊塗、中男海諸公即使瞓着覺都會嬲到扎醒吖嘛！若然係咁嘅話、揸拂人冧莊嘅機會就變得渺茫。講到呢度、在下忽然想起當年神棍沖爭身家單畸屎。佢聘用嘅狀師個個都好似被鬼迷咁、攞晒啲蝕章嘅資料去做呈堂證供、終於搞到發達不成、還要摱鐵枝。今次選委會嘅蝕章情況亦十足十遇鬼迷咁款、故江湖上流傳揸拂人冇得再留底、未必係無的放矢之說。照咁睇嚟、好快就有大龍鳳上演。咱們就走着瞧吧！