抉擇時刻

全憑嘴打浪

議事冇心裝

問君何選擇

滾水當上湯

呢嗱、參與競選人民代表者、理應拿出自己嘅政綱讓選民參考吖嘛！唯獨是自家紫荊城嘅參選者係無須製訂政綱、只須要事先抓得對手嘅把柄、然後刷乾淨棚牙跑到口水擂台數臭對方、誰數得叨就是贏家。在下很懷疑、究竟紫荊人須要的是監督政府施政和提出建設性議題嘅代表、抑或係須要一群罵街能手闖入議事堂替自己出氣的呢？上屆議員變成鬥士、議事堂亦變成鬧事堂、而且被街坊冠以垃圾堂之臭名。其間發生了連串不理性嘅事故、大型基建項目受阻而令到大帳房花費大筆公帑去填氹都算了！之但係、連民生項目都被拖累、未免太過份了吧！難道紫荊人須要的就是這些？

講開又講、議事堂會不會變成鬧事堂、基本上是由你手中的一票來決定。也許你會說、議事堂上只有政棍而無代表、把票投給誰都改變不了現狀的。請恕在下大膽講句、政棍與代表只在一線之差、而決定權同樣是由你手上的一票來做決定。意思是、當閣下選擇嘅係武生、那麼戲台上演出的必定是武打戲。但如果你選擇嘅係小生嘅話、戲台上演的就是文場戲。換言之、一切都是由選民來決定的。值得注意嘅就係、政壇上文武兼備者比比皆是、無論擔當正派或邪派角色都只不過是劇情須要、而他們所做嘅一切都只係投觀眾所好。今日紫荊政壇之所以搞到俗不可耐臭不可聞、包括你我他都有份參與炮製的。意思即係話、怎麼的選民就會選出怎麼樣的議員、而怎麼樣的議員就會發揮怎麼樣的功能。因此、無論閣下是左派、右派、中間派、抑或係無黨派人士都一樣、如果以為不去投票就可以置身事外嘅話、簡直係大借特借。因為你嘅棄權、等同間接支技你最唔喜歡嘅參選人勝出。雖然聽聞話、今期有太多籮底橙很難揀得上手、但難揀都要揀、只要在事前仔細的平衡一下利害才作出選擇、咁就一定衰架啦！係嘛？！