儒子幼稚

無知不自知

注定要執輸

不如返學去

別再傻痴痴

早前講大教館嘅鶴苑仔話、一定要將本城脫宗、最多就係唔食大六菜、唔食大六豬、唔飲大六水、一切用自己方法去搞掂喎。點知佢話口未完、就被班同學仔話佢腦殘。然而當下居然又有人話、脫宗之後可以繼續向紅家買糧和買水嘅喎！喂喂、小朋友、橫掂都係口噏當秘笈、點解唔索性話將老祖宗逐出神州大地、然後霸起佢個位來坐、到時想點都得啦！係嘛？！話時話、雖然泛獨友人人喊脫宗、但並唔係個個要講獨嘅。當中係就係有人喊獨立建國、但亦有人話要重歸米旗。照咁睇嚟、呢班友根本上毫無共識、若把注碼押在佢哋身上、肯定輸硬都得咯！

講開又講、其實呢班講獨仔嬌生慣養、向府發吓脾氣還可以、若要獨立恐怕是太過大想頭矣！打個比喻講、六十年代紅偽兵雖然在神州搞到翻天覆地、但結果係失敗告終。再講、在八十年代尾南天門那場鬥爭、亦係牽動整個神州大地、並得到世界各地支援、但仍然係衰收尾。難道到了今時今日、還有人會天真到以為只憑、𦧲地、賴死、掟石頭、就能夠迫使紅家就範？依我睇、就快笑死幕後班推手架喇！咪被我批死、幕後搞手旨在搗亂我哋嘅社會架咋。可笑嘅就係、有些為人父母者、居然攜同連腦囟都未生埋嘅年幼子女、跑去參加被篩出局的五名講獨仔搞嘅“五獨集會”感受氣氛。唉、年紀細細就被拉去“種獨”會唔會殘忍咗啲架？有些家長仲話、有必須獨立嘅喎！在下懷疑、呢啲人究竟知唔知到自己講緊乜嘢嘅呢？論實力、講獨仔跟紅偽兵冇得比、論意志又完全唔係南天門那些絕食嘅大書生嗰皮。相比之下、戰中班友、老嘢閃縮、嫩怕依郁、只能算得上是小兒科而矣！試問又何來造反嘅本事？依我睇、不如返大教館勤修苦練、學好本事、將來利己利人仲好啦！