未算荒唐

你說我癲不是癲

喊打行頭鬧冧天

荒唐霸道得關照

好人蝕底理當然

上次一拳打出六萬幾個like嘅半文錢小將六萬琦本想話乘勝追擊、參加垃圾會擂台分餅賽。點不知臨門一腳被擂台篩委掟翻出門口。好夢成空已經夠晒激氣架啦、好死唔死、仲要被條老記問長問短、而且問問埋埋嘅都係夭心夭肺、令人扯火嘅問題、確係唔嬲就瓦燒。點不知、呢條老記原來係有心嚟贈“㷫”嘅、一味死纏爛打、趕極都唔肯走開。結果在四目交投之下、啲眼火咪爆晒出來囉！就係咁、有人就被另外一個人請食兜槌鍋面、而且食到一面都係𠻹。呢嗱、咁又好難怪嘅喎、人家幾經艱難才能上契畀花大叔吖嘛！啱啱至話失咗個表演機會、並且正在煩緊唔知點向花大叔交代之際、就被人窒到嘔咁滯、直程係潮州魚蛋、唔打唔爽啦！係嘛？！

話時話、糾眾趴街、煽動暴亂、武力衝擊垃圾會、藐視判頭命令、亂足七十九日、打爛班坊飯碗唔在講、仲累到人家成檔生意血本無歸而摺埋、結果班打傘仔連毛都唔使甩一條使全身而退。之但係、唔知請人食兜槌鍋面嘅待遇又係點嘅呢？雖則話、六萬琦所持嘅目標跟打傘仔一樣、為大眾爭取權利而衝擊社會、但人家痴瘋、羅三七、兜康康三名打傘仔雖然範範斷到正、但判頭都只係罰佢白做十零日輕工、其中一人更加連輕工都唔使做、只係孭一條有期賒數、限期一滿就當無數。唔知六萬琦又有冇咁好彩呢？家陣高懸明鏡堂裡面嘅各大小判頭、果然係盲嘅。正如負責秤打傘三人組罪狀嘅判頭話齋、打傘三人組只係打起為大眾爭取權利嘅旗號而做愛做嘅事、並明白到背後只係而無害人之意、所以罰到無關痛癢咁款就係公平、公正、公開嘅喎！有街坊質疑、被打傘仔累到雞毛鴨血嘅受害者豈不是有冤無路訴？係呀、啱架、呢啲就係叫作同人唔同命、同傘唔同柄囉！家陣你哋班街坊吹啤啤咩？！