冇眼屎乾淨盲

人家開飯佢開拖

一人一句有排哦

口水未乾人便㷫

實行掩耳冇囉唆

向來用電視送飯嘅兩耳婆昨日同我講、佢話唔知點解近日晚晚都食唔落飯、連街口嘅拉布大國手苦瓜騮都束手無策喎！呢嗱、有些睇落似病、其實又唔係病嘅症狀真係會考起神醫架！幸好異靈異靈嘅問米婆陳四姑剛剛經過、仲教兩耳婆去找佢嘅「巴啦打」綽號耷頭大主教嘅司機陳幫忙。真係講都唔信、司機陳果然能人所不能。佢只係站在兩耳婆面前耷低個「酸薑蕎」望住個地拼命眨眼、然後在兩耳婆耳邊講咗五個字、就令到她食欲大振。吓、司機陳講咗邊五個字咁駕勢？之唔係“熄電視食飯”囉！假如閣下有疑問嘅話、只要在黃昏吃飯時扭着個電視機、然後撳過去費趣台睇吓那個直播節目、就知到司機陳條計仔真係使得架嘞。

唔知點解、今年對於議事堂準新貴嘅口水宣傳戰、產生一種極度厭惡嘅感覺。莫講話兩耳婆聽見冇晒胃口、即使在下也覺得食而無味。當初還以為自己心理上出現問題、但聽班街坊講起此事時、才知到在下並不是唯一有這種感覺嘅人。我們在傾談之後得出嘅結論就係、議事堂已經變成鬧事堂、所以對之極為厭惡。每次見到班尊貴不務正業狗咬狗骨嘅時候、個人就會被焫㷫架嘞、再加上一連串爆粗、擲物、拉布、流會等事件、確係唔討厭就有鬼啦！係嘛？！最大鑊嘅就係、有人發現自己有眼無珠、搬起石頭抌自己對腳吖嘛！咁你話嘞、當一個人每晚開飯時間都有呢種負面感覺嘅話、又點可能食得落呢？所謂一朝被蛇咬、十年怕草繩。現在一撻着個電視又見到一眾準新貴喺度煲冇米粥、難免有人會覺得眼冤嘅。因此在下奉獻街坊一聲、當你發現在晚飯時間就感覺到胃納不佳嘅話、不妨暫時轉台或熄機、確保自己安心用膳。否則一個不留神、患上厭食症嘅話、咁就手尾長咯！之但係、票還是要投的、只須記緊帶眼識人就是。