抉擇時刻

全憑嘴打浪

議事冇心裝

問君何選擇

滾水當上湯

呢嗱、參與競選人民代表者、理應拿出自己嘅政綱讓選民參考吖嘛！唯獨是自家紫荊城嘅參選者係無須製訂政綱、只須要事先抓得對手嘅把柄、然後刷乾淨棚牙跑到口水擂台數臭對方、誰數得叨就是贏家。在下很懷疑、究竟紫荊人須要的是監督政府施政和提出建設性議題嘅代表、抑或係須要一群罵街能手闖入議事堂替自己出氣的呢？上屆議員變成鬥士、議事堂亦變成鬧事堂、而且被街坊冠以垃圾堂之臭名。其間發生了連串不理性嘅事故、大型基建項目受阻而令到大帳房花費大筆公帑去填氹都算了！之但係、連民生項目都被拖累、未免太過份了吧！難道紫荊人須要的就是這些？

禁鬼禁馬咩

二十三題冇得傾

國人教育門前清

改革不成添業障

戰中種下不了情

呢嗱、大概唔使問阿貴、各位街坊都知到上面四句嘢係講緊乜架嘞。冇錯、係講緊紫府在大歸之後嘅不濟現象。究竟點解會搞成咁嘅呢？答案就係、有人越玩越過界嘅結果嚟囉！也許你會話、並唔係所有街坊都係玩嘢一族。對的、實情的確只係部份人嘅愛好、而呢啲都係要同阿爺拗手瓜嘅人。湊巧地、這群玩家當中有些人是掌控着本城嘅重要樞紐、恐怕連阿爺暫時都只能扮眼唔見。相反地、如果呢班人要玩紫府揸拂人、咁就話都冇咁易。回顧當年、老古董唔係被人玩到殘晒之後才躀低嘅咩？

播種

港人亂講煽歪風

莊家猶如在夢中

教頭公然搞亂檔

今年講獨勢如虹

泛㒼力指講獨是當今揸拂人管治霸道而迫出來的、並在垃圾會擂台爭霸戰臨近之際、以趕走暴君為宣傳口號。呢嗱、咪話在下又撥冷水、呢種講法係人都知到係屁話嚟架啦！事實上、連阿水都知到講獨係由戰中催生出來、而戰中係花大叔在背後掟銀、再由一群大教頭利用三年多時間公開鼓吹而成的。換言之、講獨其實就是戰中嘅第二部曲、將來還可能有三部曲、四部曲、甚至五六七八九部曲。係人都睇得出、泛㒼在講獨方面是扮演着西南二伯父角色、明知錯而不反對、而且還暗中幫忙。如果唔係嘅話、點解每一次揸拂人出手對付講獨之際、泛㒼之中總有人跳出來指手劃腳、罵揸拂人違反這個、違反那個呢？於我睇、呢班友再唔趕快轉彎嘅話、到最後可能有人陸雲霆睇相、唔衰攞嚟衰咯！

冇眼屎乾淨盲

人家開飯佢開拖

一人一句有排哦

口水未乾人便㷫

實行掩耳冇囉唆

向來用電視送飯嘅兩耳婆昨日同我講、佢話唔知點解近日晚晚都食唔落飯、連街口嘅拉布大國手苦瓜騮都束手無策喎！呢嗱、有些睇落似病、其實又唔係病嘅症狀真係會考起神醫架！幸好異靈異靈嘅問米婆陳四姑剛剛經過、仲教兩耳婆去找佢嘅「巴啦打」綽號耷頭大主教嘅司機陳幫忙。真係講都唔信、司機陳果然能人所不能。佢只係站在兩耳婆面前耷低個「酸薑蕎」望住個地拼命眨眼、然後在兩耳婆耳邊講咗五個字、就令到她食欲大振。吓、司機陳講咗邊五個字咁駕勢？之唔係“熄電視食飯”囉！假如閣下有疑問嘅話、只要在黃昏吃飯時扭着個電視機、然後撳過去費趣台睇吓那個直播節目、就知到司機陳條計仔真係使得架嘞。

未算荒唐

你說我癲不是癲

喊打行頭鬧冧天

荒唐霸道得關照

好人蝕底理當然

上次一拳打出六萬幾個like嘅半文錢小將六萬琦本想話乘勝追擊、參加垃圾會擂台分餅賽。點不知臨門一腳被擂台篩委掟翻出門口。好夢成空已經夠晒激氣架啦、好死唔死、仲要被條老記問長問短、而且問問埋埋嘅都係夭心夭肺、令人扯火嘅問題、確係唔嬲就瓦燒。點不知、呢條老記原來係有心嚟贈“㷫”嘅、一味死纏爛打、趕極都唔肯走開。結果在四目交投之下、啲眼火咪爆晒出來囉！就係咁、有人就被另外一個人請食兜槌鍋面、而且食到一面都係𠻹。呢嗱、咁又好難怪嘅喎、人家幾經艱難才能上契畀花大叔吖嘛！啱啱至話失咗個表演機會、並且正在煩緊唔知點向花大叔交代之際、就被人窒到嘔咁滯、直程係潮州魚蛋、唔打唔爽啦！係嘛？！

衙門有鬼

天師䁯眼瞓

群鬼鬧紛紛

盲巫玩賭命

遲早斷三魂

怪事年年有、今年特別多。勢難想象、在這個年頭民間居然會過問衙門捕快升遷之事。早前開封衙門人稱煲爛梨嘅大刀頭升級不成劈刀唔撈。此事經過政棍輾轉相傳之後便在坊間發酵、甚至鬧到上垃圾會去。近日有心人請得前朝嘅蕃鬼開封府尹師伯曳千里迢迢從米旗國跑到紫荊城來跟賣田李密斟、然後狗捉老鼠管起開封衙門嘅內政來。此公仲暗示、今日嘅華督唔似得當年嘅洋督咁有正義之氣、所以應該修改條例以令開封衙門在不被干預之下運作。期間、未曾展翅恨天低嘅深閨怨婦陳四婆又跳出來、力指刀頭唔撈是極不尋常嘅事嚟喎！

儒子幼稚

無知不自知

注定要執輸

不如返學去

別再傻痴痴

早前講大教館嘅鶴苑仔話、一定要將本城脫宗、最多就係唔食大六菜、唔食大六豬、唔飲大六水、一切用自己方法去搞掂喎。點知佢話口未完、就被班同學仔話佢腦殘。然而當下居然又有人話、脫宗之後可以繼續向紅家買糧和買水嘅喎！喂喂、小朋友、橫掂都係口噏當秘笈、點解唔索性話將老祖宗逐出神州大地、然後霸起佢個位來坐、到時想點都得啦！係嘛？！話時話、雖然泛獨友人人喊脫宗、但並唔係個個要講獨嘅。當中係就係有人喊獨立建國、但亦有人話要重歸米旗。照咁睇嚟、呢班友根本上毫無共識、若把注碼押在佢哋身上、肯定輸硬都得咯！

大龍鳳前奏曲

戰中不遂搏偷雞

煽班門生再起圍

收起天書鬥法寶

慢調斯理壞天規

政治呢家嘢既黑暗又污穢、但無疑是一面能夠將政棍嘅醜惡嘴臉照得一清二楚嘅照妖鏡。日前「戰中三縮」之一嘅戰中廷公開喊話、指稱歸本法只規定垃圾會尊貴必須擁護歸本法、但並無闡明參選人都要擁護、故質疑選委會阻擋泛獨參選人入閘係濫用權力喎！唉、戰中廷呀、戰中廷、你老母湊大你咁辛苦、點解你總係學而無術嘅呢？試問、你阿媽嗌你喫飯、你係咪淨係扒飯而唔夾餸嘅呢？須知到世界上唔係所有有關連嘅事物都要續一闡明、因為人係有普通常識吖嘛！在下決不相信閣下不明此理。唯望你老哥合埋貴口、放過班後生仔吧！

小圈子擂台 之 蠢動

牌頭二對一

鬥到屙拔甩

間歇發牙痕

人皆多嘰趷

在去年“個㷫”酒會裡面、連眼尾都懶睄結拜大佬啱曾一眼嘅抓錢華、近日忽然稱讚啱曾嘅“行企功夫”係城中無人能及。點不知、佢話口都未完、就被眾街坊插到頭暈眼花。事關街坊一聽到啱曾嘅大號、就會火都嚟埋嘅。事實上、此君早就被冠以“生前累大眾、死後累街坊”之惡名。因為他揸拂七載眼中有富冇貧、老走後還要留低大坺洗極都唔清嘅蘇州屎畀街坊嘆吖嘛！然而、抓錢華寧做非洲和尚都要指着一坺屎盛讚其色香味俱全、相信其講話對象並唔係普羅大眾、而係豬營大戶。注於點解、大概畫公仔都唔使畫到出腸啦！係嘛？！

選戰風雲 之 爆陰毒

山人一出招

群鬼盡折腰

你既無厘頭

我亂掟飛鏢

呢嗱、所謂你有張良計、我有過牆梯吖嘛！你有你揸拂人下令設置障礙、阻擋廢能青年進場參加金紫荊公開擂台大賽。我有我「搣飛佬」隨心所欲放人或擋人、懶得管你規舉不規舉。廢能青年敲大裁判嘅門、並要求特事特辦立即廢除障礙、好讓他們能夠參加比賽。但大裁判偏偏好似食咗十擔豬油咁款、仲話此要求並無迫切性嘅喎！就係咁、便留下它朝推翻賽果嘅伏筆喇！