肥懷係炸彈？

難知真或假

好歹由人話

各自出噱頭

橋舊無有怕

時逢驅異會大選期近、紫荊大舞台又有好戲上演了！近日坊間輿論指公園會大家姐阮嫻遲不出手、早不出手、而偏偏要在驅異會大選即將來臨之際、大張旗鼓的送「三非兒」肥仔懷去入境衙門自首、是有心焫着極土幫把火、以令反盟難看。理由係、弓幫二當頭張紅和三當頭張似兩人、都是反盟陣中專門負責為民抓福利嘅代表、假如反盟袖手旁觀、就被指為高舉福利旗幟呃飯食。假若貿然出手、勢必會受到本地幫狙擊。點做都會對未來選情構成障礙。之但係、雙張在未睇通形勢之前死人冧樓都唔出聲之外、連一向善於用口水浸死人嘅涼茶大狀都在記者面前扮啞仔。如果係真嘅話、都咪話阮嫻呢招唔擺命。

人所共知、出手協助三非兒是件吃力不討好的事、萬一踩錯腳就會變成犯眾憎。但眼見今次阮嫻並無因此而觸犯眾怒、反盟就知到假如再不作表示嘅話、對反盟整體形象恐怕會有負面影響之虞。但若然直接踩隻腳落肥仔懷呢單畸屎裡面嘅話、又恐怕會被人指責抽阮嫻嘅水、以及惹來本地幫瘋狂狙擊。如此一來反盟豈不是陷入豬八戒照鏡、裡外都不是人嘅局面裡面？經過一輪閉門從長計議之後、反盟決定由與福利界無關嘅黑仔桃出面扮鍾馗、喝令堵塞在阮嫻辦事處門口嘅孤魂野鬼、不得妨礙阮嫻接見市民。據講、反盟做這台戲既可避免牽涉入肥仔懷單畸屎裡面之外、又能夠展示一下反盟路見不平拔刀相助嘅豪氣喎！按目前形勢看來、今次事件只屬序幕、勝負未分。相信在未來三個月裡面必有好戲連場、大家不妨拭目以待吧！