霸權世界

你發佢又發

憑沙撈石刮

獨食冇商量

人皆玩爛笪

劃地會終於通過粉靚區和古董區嘅劃地計劃、兩地將會共建六萬個住宅單位、其間私宅和公宅各佔一半。本來多建幾萬個公宅是基層市民渴求嘅事、但係當這個計劃一出門口就立即遭到強烈反對、而且反對團體還聲稱不排除提出撕法覆核嘅可能。恐怕這麼樣一搞、又唔知要拖幾耐矣！江湖上有傳聞指、由於紫府收地價錢和賠償額都比大戶低很多、以致地主和住戶均大為不滿。於是有人與反對團體攜手製造事端、迫使紫府提高收地和賠償金額之餘、同時亦迫使紫府檢討目前嘅土地政策。

呢嗱、傳聞歸傳聞、但紫府在分餅仔方面確實惹下不少麻煩。且看這個數千億嘅巨型project大部份由三個超級個大戶瓜分、其餘小部份亦落在另一超級大戶手中。換言之、即係連汁都撈埋、如果話無人眼紅就假嘅。一直以來、紫荊城不時有人喊貧富懸殊愈來愈厲害。不過如果閣下以為這類無病呻吟只是來自基層的話、那就大錯特錯。記得在上任縣太爺掌權時、這句話是曾經出自紫荊鼓王的口、而他所指的貧富懸殊實在是形容當時地產界嘅壟斷狀況。梳打賭聖說得更加明白、他質疑何解紫荊城發來發去只發一個人、而且那人已經肥到連襪也穿不上、何解紫府還要獨係益佢？今日雖然由只益一個人變成多益幾個人、但地產壟斷情況依舊。所謂不患寡而患不均、不患貧而患不安、假如紫府繼續沿用前朝嘅土地政策、本城大部份土地勢將繼續由幾個有能力大量囤積土地嘅超及大戶壟斷、而紫府嘅房屋政策就有如蛋家雞見水一樣得個睇字、社會上嘅怨氣更加難以舒緩。雖然係人都明白、若要解決壟斷問題以達至改善民生就必須以立法為手段。但令人費解嘅就係、無論是紫府嘅大老爺們、抑或是人民公社嘅代表諸君皆絕口不提此事。究竟點解會咁嘅呢？大概無須由我來講啦！係嘛？