鬼拍後尾枕

冇着發嚕囌

闊佬你又嘈

點都唔合意

到底有何圖

縣府計劃將九月三日訂為「特別」勞工假期、紀念國家抗戰勝利七十周年。本來打工仔獲得多一天額外嘅有薪假期係件開心嘅事。點不知白鴨幫長老騸雞居然話、呢啲係縣府與朝廷合謀安排嘅政治假期、完全唔值得鼓勵、仲話考慮投反對票將之否決喎！唉、連放日假都關政治嘅事、咁你話死唔死？喂喂喂、騸雞哥哥、你有冇諗多咗架？人家內地十幾億人同樣享有這一天額外假期、你唔係認為阿爺為咗統戰紫荊人就搵咁大棚人出來做妹、係嘛？仲有呀、你老哥食飽無憂米、放唔放假都冇所謂、但係其他打工仔一年做到晚、今次咁好彩無端端放多一日便宜假、正式係皆大歡喜吖嘛！使唔使下下政治上身、搞到咁掃興呢？喂、你冇權咁樣做架！知冇？

呢嗱、所謂人旺有相睇、幫旺都有相睇嘅。若要看一個幫派嘅興衰、只須要看其骨幹一言一行便可以看得出端倪。例如早前鐵頭英雄上身不聽勸告、硬是要開出一張辭職公投嘅期票、仲話包冇甩底。結果大家都有眼睇、張期票是空頭的。既然無十成把握、又何心丟人現眼？點知話口未完、又輪到騸雞扮非洲和尚、究竟咁搞法、係咪想博執笠架？其實今次無論倦派抑或反派嘅幫會大都湧躍支持勞工屆獲得這日一次過嘅額外假期、甚至有人認為能夠訂為永久性假期就更好。唯獨是白鴨幫要以高資態要唱反調、如此舉措確實令人費解之至。若然騸雞不是反紅反上腦嘅話、恐怕係思覺方面出現失調現象。如果係咁、就應該盡快去見醫先了！