餿油與租

世界難撈亦要撈

黑心作業有前途

租金昂貴擋米路

唯有盡地博一鋪

曾幾何時紫荊城被譽為當世美食天堂、點不知突然爆出超過五百家店鋪以餿水油來奉客、其中包括連銷式快餐店、中西餅店、麵包店、雲吞麵店、甚至連酒店都有。當事件在城中曝光之後、不獨只人人眉頭皺、個個眼光光、甚至連咱家美食天堂嘅招牌都噏噏槓。今回蕃薯葉唱嘅捐血老歌『阿哥捐血、阿姐捐血、老梁老何共老林都損血、大家捐血、你捐咗未？』又派用場啦！之不過是改編為『阿哥賴嘢、阿姐賴嘢、老梁老何共老林都賴嘢、大家賴嘢、你賴咗未？』嚟唱之嘛！咁、你話死唔死？

以前一提起黑心食品、人們很自然就會想起家鄉嘅黑心聯誼會。不過到咗今時今日情況已經不一樣。今日黑心聯誼會已經發展成世界性組織、即使一向被公認為食安最靠得住嘅老大哥山姆大叔、都以經成為重心會員。大約一年半之前、內地雞老伯餐廳被揭發以含有致癌物質嘅快大雞奉客、近日城中小丑嘜餐廳也被踢爆將過期肉餅夾麵包賣畀人食。呢啲事聽起嚟好牙冤、但亦只不過是冰山一角而矣！究竟點解忽然之間會有咁多黑心食物充斥市場？答案就係成本兩個字作怪。

講到成本就離不開租金、而租金更加離不開地產。在地球上除咗賣白粉和賣軍火之外、最容易發大財嘅就係賣樓。無論世界點艱難都好、人總是須要住宿的。當人們稍有餘錢嘅時候自然想到置業安居。在世界經濟不景氣嘅時候、人們自然會節省開支、唯獨是賣樓就幾貴都要買。事實擺在眼前、樓價愈高、買者愈多。愈多人買樓、愈扯高樓價。在這互動因素牽引之下、租金自然會被扯高。呢啲咪叫做水漲船高囉！聰明嘅商家和炒家早就睇準這一點、並且挖盡心思將你在銀行的存款轉入他們的戶口去。當然、如果冇高地價政策配合嘅話、呢個密底算盤就點打都打唔響嘅。

依在下之見、即使餿水油問題獲得解決、但根本性問題繼續存在嘅話、黑心食物必定陸續有來。其實使用餿水油嘅商戶喊冤、根本上就係做戲咁做。平嘢冇好、好嘢冇平、係生意人最基本信念嚟吖嘛！現在嘅環境係、餿水油價錢比正常豬油平一倍、如果你係用家嘅話、都會想一想有冇咁大隻蛤乸隨街跳啦！何況係精打細算嘅生意人？呢單嘢愈講愈心寒、你估仲有幾多唔見得光嘅嘢、尚未被揭發出來呢、吓？