紫荊勝過史葛蘭？

唔怕貨比貨

最怕唔知錯

生人說死話

遲早大家禍

高呼脫離大北列癲帝國獨立嘅史葛蘭、獲得嘅支持度大幅飆升之際、首相家霉倫立即放話保證、如果時史葛蘭不脫離大北列癲嘅話、便會提高其財政自主權。心水清嘅人一聽就知曉、原來史葛蘭並不擁有財政自主權的。由此推算、在其它方面也可能沒有自主權的。那就難怪史葛蘭人喊着要賣甩大北列癲啦！呢嗱、照咁睇嚟、咱家紫荊城就叻過史葛蘭喇！起碼咱家嘅財政是自己揸拂作主、唔使下下向中央請示吖嘛！仲有呀、唔使幾耐就會擁有一人一票選縣首嘅權利、雖然只是一個鳥籠式選舉、但總算踏出第一步。

一向喜歡將它鄉之土搞到四分五裂嘅大北列癲、就快現眼報喇！今次輪到自己後欄起火、史葛蘭人要求脫大獨立、民調顯示支持獨立的少壯派人數、以經超過反對獨立支持者。就在前幾日之嘛、嗰位咬緊長糧嘅事頭婆衣履沙拔亦不安於室、走出來公開表示憂慮。喺咁嘅環境之下、你話身為首相嘅家霉倫唔揗雞就有鬼嘞。目前北列癲人自顧不暇、已經唔得閑對咱家『紫改』指手畫腳喇！

講到『紫改』呢家嘢就認真濕滯、下議院定出嚟嘅框框分明係唔侵幻民玩。以目前形勢而言、如果不接受這個框框、反對派必定會以卵擊石、後果當然是全城基層普羅大眾一起陪葬。若然做順民接受這個框框的話、相信將來嘅選民大概只能局限在亂制派之中作出選擇、恐怕這並非紫荊人主流意願。其實大家都心知肚明、朝廷之所設置重重關卡、無非是不讓『翻盅亂講』分子有機可成。問題是、難道紫荊人會愚蠢到選擇這麼樣的人物出來倒自己嘅米嗎？講到尾、就是離不開一個信字。開講都有話啦、將心比心吖嘛！你信唔過人、又怎能叫人相信你？近來一股濃烈嘅『聞鉀』氣味瀰漫着紫荊城、更加令人有種不祥之兆嘅感覺。哀哉！