暗戰

你有金鐘罩

我現透骨爪

招來又招往

那懼惡相交

呢嗱、過咗氣嘅細圈坐館阿狼退出武林之後、粒聲唔出便跑到大圈旗下嘅水陸財路司任職無薪高層、使得應屆坐館冧姐被班爛民窒到面都黃埋。殊不知、就在此時過氣大算盤阿𠾍亦被發現、在未經申報之下在孖葉台開咪做無薪主持。冧姐見狀便喝令佢必須立即申報、不得破壞細圈嘅規舉喎！點不知有人居然借白鴿仔聽灼林把口來做傳聲筒、指着冧姐個鼻哥狂罵佢處理阿狼和阿𠾍兩單畸屎係雙重標準、並說阿𠾍做義工無須申報𠻹。嗱、真係唔知就被佢嚇死、知到就笑死咯！其實收唔收錢並不是問題、問題係申報人份工嘅性質對細圈機密外泄風險有幾高吖嘛！嗱、阿𠾍份工係在廣播台開着個咪口噏噏、以佢嘅前身份來說、講大一句都會天下大亂。你認為佢使唔使申報呢？聽灼林曾經在青天衙門當過差都盲巫成咁、確係灼得佢少咯！

路邊社透露、冧姐早就想教訓一吓狂莽自大嘅阿狼和招即嘅阿𠾍、卻忌於阿狼背後盞大光燈太過𥋇眼而不敢直視、又怕咗阿𠾍背後嘅那群講惡不講理嘅黃思、惟有則得就則、唔則得都要則囉！幸好今次兩壇嘢都係斷到正、即使不能手起刀落、都要兜羅友伸佢哋一腳來出翻口氣啦！嗱、阿狼就乖乖補上一份申報、但阿𠾍就睬佢都有味。之不過、無論阿𠾍發爛渣也好、又或者那些「見義勇違」嘅爛鬼藉口搗亂也好、點都冇所謂嘅。佢哋越係鬧得厲害、對冧姐越係有利。因為當四圍都焫着晒嘅時候、身為坐館嘅冧姐就可以順理成章的把離職後申報利益正式列為紀律化、誰人膽敢違反就要受罰、再唔係好係加陣咁口講口賠毫無約策力嘅。冧姐似乎要話畀黃藍兩路人馬聽、咪以為大光燈夠照、黃思聲夠大、就冇人敢動佢哋。嗱、呢招借他人之手掌來摑他人之面、既能發泄一肚子悶氣之外、亦可將申報漏洞填補、都算係建設嚟。不過、話雖然係咁講、但世事嘅嘢又點會真係咁簡單？如果我係冧姐嘅話、就會考慮退一步以求海闊天空、安安穩穩做完五年之後收埋啲數尾返歸、印印腳睇吓班馬騮點樣舞、總好過自己做馬騮被人舞吖嘛！