2017年10月20日星期五

又要等埋發叔?


人輸陣也輸
神仙冇力醫
反盟唔知埞
恨悔已經遲

尋日、垃圾會又出現流會、即係話納稅人嘅銀両又白花了!件事係咁嘅、由於反盟認為亂制趁住六名反派被“搣甩”就提出修訂議事規則議案是乘人之危所為、所以又使出拖延戰術。期間兩幫人輪流玩失踪和喊點人頭、結果玩出個流會來。嗱、反盟就話到明要等埋發叔架喇!即係話、佢哋要將匹布拉到明年三月補選結果出嚟為止。反盟認為、目前嘅人手係不足以構成反對喎!嗱、亂制今次必定會趁勢爭取修例嘅、反盟想話事就爭氣啲、在嚟緊選戰打敗亂制至係吖嘛!現在發爛渣唔止冇用、仲搞到自己更加乞人憎。因為佢哋嘅小學雞邏輯就係、目前垃圾會通過任何一個議案都可以被視作為不公平、不公正、以及乘人之危。咁搞法、只能被街坊視為霸道和野蠻架咋!知冇?

眾所周知、在一場足球賽事裡面、如果有球員犯規而被球證出示紅牌驅逐出場之後、賽事係唔會停下來嘅、對方球員定必趁佢病攞佢命、加強攻擊力度爭取入球、而被罰一方嘅球員係唔會因止而妨礙賽事進行嘅。呢啲就叫作職業道德、係唔會因個人意願而轉移的。試問一聲、有誰見過要「等埋發叔」入場才准對方球員射龍門嘅呢?加陣發叔都去咗咁耐啦!即使要等、都只有佢等人、焉有人等佢之理?由此可見、反盟班友除咗發爛渣之外、就真係乜料都冇咯。得罪講句、誰叫嗰六隻蠢蛋唔爭氣、係都要自己整死自己呢?如果唔係、又使乜搞到今時今日咁嘅地步?今次擺到明係反盟輸咗唔份輸、兼且𨂐落地吓死𠼱。咁、你話嘞、反盟畀人嘅人印、係咪有口話人、冇口話自己呢?我話你知啦、今次反盟無論在情、在理、全都一鋪清袋架喇!街坊亦領教到其中滋味係點嘅、以後知到點做才能確保自己利益不受損害。如果反盟再唔好好哋反省一吓、唔淨止輸人、仲會連個陣都輸埋。人家亂制財雄勢大兼早有準備、到補選時就會唔聲、唔聲、嚇你一驚。若然反盟繼續做非洲和尚(黑人僧)嘅話、到時就會唔聲、唔聲、自己碰釘至係。信不信由你。


13 則留言:

  1. 你估反盟他們不知嗎…
    但如果唔再繼續反的話,咁佢哋就一啲價值都沒有了!

    回覆刪除
  2. 「輪流玩失蹤和喊點人頭」真係太過份!

    回覆刪除
  3. 球場內
    如果球員夠技巧
    拉布都有可能博和
    所以現今就有泊大巴戰術出現

    回覆刪除
    回覆
    1. 對的、但城中政棍呃飯食多、有能之士大少喇!

      刪除
  4. ♦¨*☾好友🌜晚安☁・。。゚🌛
       ╭───────╮
       │瞓覺豬呢💤│
       ╰───────╯
    ╭───────╮
    │甜夢安睡💤│
    ╰───────╯
      O⊹
       o❉
     .∧_∧・。。゚
     ( ・ω・ )
     |⊃/(___۩۞۩・。。゚✾
    /└-(____/*•ೋஜ
    🌟╠╣aΡpy週末ഐ✨

    回覆刪除
  5. 開會唔夠人係究由自取,如果唔係因為糧油及其他飯盟自大,玩轉個場,攪到油盡糧絕,又使乜今時今日人丁單薄呢? 重整咗單釘書機說謊男,真係好荒謬! 如果唔係穿咗煲,飯盟重喺度振振有詞,大罵中央!
    唉! 為反而反,這就是他們的立場。

    回覆刪除
    回覆
    1. 有人話、這是反盟本性。但在下不敢苟同、但相信係錢作怪。

      刪除
    2. 他們的立場~當然是由金錢主導啦。唔通係為了精忠報黨? 他們收黑金被揭發,跟住有單大事爆發,以為可以轉移視線啫。

      刪除